P4-M na shabu nakumfiscar sa dayuhan na supplier sa CamSur

Sarong pigtutubodan na nagsusuplay nin ilegal na droga sa Camarines Sur an natalikop na kan mga awtoridad sa ginibong buy-bust operation sa Brgy. Pawili, Pili, Camarines Sur kan Sabado, Agosto 2, 2025 na nakumfiscar an P4-milyon na cantidad nin shabu.

An suspek nginaranan sana sa alias ‘’Munasanip’’, 30-anyos, may agom na residente kan Fort Area, Baseco, Tondo, Manila alagad naarestar sa saiyang pig-eestaran sa banwaan nin Pili.

An saiyang pig-eestaran sinakyada mga alas 4:40 nin aga na pigconducir kan pigsarong fuersa kan PNP Bicol Regional Police Drug Enforcement Unit 5, Pili Municipal Police Station, asin Provincial Intelligence unit kan CamSur Provincial Office, sa koordinasyon sa Philippine Drug Enforcement Agency, Regional Office V.

Nakumfiscar sa suspek an doceng heat-sealed transparent plastic sachets na nagcacantidad nin Php4.080,00. Yaon na sa disposisyon kan MPS Pili na nagpapadagos pa an imbestigasyon kan posibleng mga pigsusuplayan digdi sa provincia.

Nag-aatubang na nin caso an suspek sa pagbalga sa RA 9165, na midbid sa Comprehensive Dangerous Act of 2002.

An Bicol PNP sa pamamayo ni BGen Nestor Babagay Jr., Acting Regional Director, tolos man nagtao nin komendasyon sa mga operatiba nganing madakop an dakulang sira sa ilegal na droga sa CamSur.

P4-M na cantidad nin shabu nasa retrato asin an nadakop na suspek nararamalan mantang nakahurohog. Nagkakaigua nin inbentaryo sa mga nakumfiscar na ilegal na droga mientras nagheheling an mga testigos. (Retrato: PNP CSur)