top of page

P5-B 2023 annual budget kan CamSur aprubado na

Pili, Camarines Sur --- Sa voto sampolo kontra duwa sa Sangguniang Panlalawigan naaprubaran tolos an kulang sa Php5 bilyon na annual budget para sa 2023 kan gobierno provincial kan Camarines Sur.


Alagad nagbaba nin P400 milyon an prosupuesto kasunod kan paghuros kan marerecibing National Tax Allocation o si dating Internal Revenue Allotment (IRA).


Si Vokal Romulo Hernandez, Co-Chairman kan appropriation committee kan junta provincial nagsabi na nag-agi sa gabos na proceso antes na-aprubaran sa ginibong sesyon regular kan Decembre 7, 2022.


Sa masunod na taon gabos na lokal na gobierno nagbaba an NTA huli kan hababang koleksyon nin buwis sa laog nin duwang taon apekto kan pandemya.


An komite sa pamamayo ni Vokal Waren Señar kan premir distrito kan Camarines Sur nagpaapod nin mga committee hearing antes ninda naaprubaran sa ika-tolong pagbasa.


Alagad sinda Vokal Emmanual Llaguno asin Vokal Eugene Fuentebella parejo kan cuarto distrito dai nagvoto pabor sa 2023 annual budget mantang dai sinda nakakarecibe kan kopya kan proposed annual budget na iyo an dapat masunod na proceso.


Nagvoto pabor iyo an miembros kan mayoria grupo na kaalyado ni Gobernador Luigi Villafuerte.


Sinabi man kan pamayo kan komite bako sinda an dapat pagbasolon huli ta perming awsente sa sesyon an nasa oposisyon na miembros kan junta.


Sinabi pa ni Llaguno, an mayor na isyu sa pag-aprubar kan annual budget, sa plenaryo pa sana dawa mayo sinda tinawan kopya kan budget inaprubaran kan mayoriang miembros kan SP.


An gibong ini nakaka-warang respeto sa miembros kan junta, sabi pa kan vokal kan cuarto distrito.

コメント


bottom of page