top of page

P53.6-M venta kan Kadiwa stores sa Bicol

Sa laog nin anom na bulan nagsakat na sa P53,658,946 an mga venta sa Kadiwa stores sa Kabikolan na kinababalihan kan hale sa Department of Agriculture (DA), Farmers Cooperative and Associations (FCAs), Kadiwa on Wheels asin Kadiwa ng Pangulo mantang nakaserbe na sa 168,618 na familia.


An Kadiwa na saro sa programa ni Presidente Ferdinand Marcos Jr. bilang sekretaryo kan Department of Agriculture saiyang pig-orgulyo sa ika-duwang state of the nation address huli kan milyon-milyon pesos nang venta asin ribo-ribong household an naserbihan.


Si Luvella Guarin, regional information officer kan DA Bicol nagpahayag sa entrevista kan Bicol Mail an anom na bulan poon kan Enero hasta Hunyo ngunian na taon.


Sa ngunian an DA igwa nang labi sa cuarentang kadiwa dai pa kabali sa FCAs, asin Kadiwa on Wheels. Sa gabos na Kadiwa ng Pangulo igwang mga venta nin P2,278,880 na nakaserbe sa 9,096 na household, sabi pa kan DA.

Kadiwa ng Pangulo sa Bicol ribo-ribong konsumedores an nakikinabang sa baratong presyo kan mga produkto agricultural. (DA Bicol)


An Kadiwa iyo an direktang nag-aangkat kan produkto agrikultural sa paraoma nganing ipabakal sa konsumedores sa baratong presyo mantang sa Kadiwa ng pangulo iyo man an nagpapabakal kan baratong presyo nin bagas sa cantidad na P25.00 cada kilo.


Dinagdag pa ni Guarin nagpapadagos an saindang caravan cada 15th asin 30th kan bulan kabale an DA 5, saka mobile pasiring sa Manila asin provincias kan Kabikolan.


Mientras tanto, pighihidaw kan mga konsumedores sa Ciudad nin Naga si plano kan City Agriculturist Office kan City Hall na magbugtak nin Kadiwa Center alagad dai nadagos. (dpa)


Comments


bottom of page