P56-M danyos sa agricultura sa Bicol huli kan tubig baha

Pili, Camarines Sur --- Inabot man giraray nin milyones de pesos an danyos sa produkto agricultural sa Bicol sa nakaaging maabot sa tolong aldaw na pag-uran huli kan inaapod na ‘‘shear line’’ kan PAGASA.

Sa entrevista ki regional information officer Lovella Guarin kan Department of Agriculture (DA) huli kan hararum na tubig baha nalantopan si mga paroyan mantang naghapla sa daga si plantasyon nin mais sa Camarines Norte asin Albay.

Sa pinakahuring naikurit kan DA hali sa mga opisina Municipal Agriculturist sa anom na provincia kan rehiyon nag-abot sa total na Php56,052,998 na igwang total na apektadong paraoma 2,518.

Sa paroyan nag-abot sa Php755,698 si danyos sa Albay; Php39,177,445 sa Camarines Sur; sa corn plantation sa Camarines Norte – P11,400 asin Camarines Sur – Php16,51,455 asin sa High Value Crop Development Program – Php57,000. Sa Production loss nag-aabot sa 1,609 metrico tonelada.

Mayong nangyaring makusog na mga pagduros envez an dahilan iyo an halawig na bulos nin uran na nagcausa nin mga pagbaha patin na sa mga tanuman nin mais an inabot nin tubig.

Nanghinayang si ibang mga paraoma apesar na aanihon na sana inabot pa nin perang aldaw na pagbaha asin dai na napakinabangan.

Dawa na ngani apektado kan mga pagbaha an mga paraoma alagad an saindang isusunod iyo an pag-anom nin pagtaruk giraray nin paroy.

An programa kan DA iyo an pagbariwas nin libreng banhi asin posibleng abuno sa mga apektadong mga paraoma.

Sa record kan Office of Civil Defense, maabot sa 245 mga pagbaha sa trenta y cinco LGUs sa Camarines Sur, Albay, Camarines Norte, Catanduanes asin Ciudad nin Naga. Igwa man nin 1,555 na mga familia o 6,120 persona an natabangan kan mga lokal na gobierno nganing madara sa mga evacuation center. (dpa)