top of page

P5K ayuda kan DA sa paraoma hinahalat na

An Department of Agriculture sa Bicol naghahalat nalang kan guidelines kan saindang opisina sentral sa pagwaras kan ayuda sa paraoma na cantidad P5,000 na nasa listahan kan Registry System for Basic Sectors in Agriculture (RSBSA).


Alagad an mga benipisyaro si may pig-ooma nin duwang hektarya pababa, sabi ni Lovella Guarin, regional information officer kan DA Bicol.


An RSBSA iyo an opisyal na listahan kan gobierno tanganing an mga lihitimong paraoma iyo an makarecibe nin ayuda asin ini an nagiging basehan sa pag-implementar kan mga programa, particularmente kan DA sa pagpanao nin asistencia sa abuno, banhi, cash, asin iba pa.


An asistencia finansyal sa paraoma dati nang pigwawaras kan ahencia na an fundo gikan sa Rice Tariffication Law (RTL)


Dai palang nahahaloy pinirmahan na ni Presidente Ferdinand Marcos Jr. an pagpaluwas nin fondo nganing itao na an sinambit na ayuda alagad an ibang grupo nin paraoma disganado huli ta pinaboran si mayayaman nang rice retailers na nagrecibe nin P15,000 sa halipot sanang panahon kan E0 39. An paraoma iyo an haloy nang nalulugi, cinco mil sana an saindang biyaya.


Dinagdag pa kan DA na ngunian na bulan nin Oktubre 2023 iyo an aranihan nin paroy na posibleng maghuros an presyo kan paroy sa mga pribadong kumprada mantang halangkaw an produksyon.


Pig-eenganyar kan ahencia na darahon na sana sa mga buying station kan National Food Authority mantang halangkaw na an presyo sa P23.00 hasta P26.00.

Komentarze


bottom of page