P650-M uutangon kan Capitolio naaprubaran na mayong nagcontra

Pili, Camarines Sur --- Naaprubaran kan Sangguniang Panlalawigan kan Camarines Sur an resolusyon na nag-aawtorisar ki Gobernador Migz Villafuerte nganing mag-utang nin P650-M sa bangko na mayong nagcontra sa campo kan oposisyon.

Nagkapera sanang kahapotan kun tano ta mautang alagad mayong ‘‘objection’’.

Ini an mga pahayag ni Vocal Angel Naval kan tercer distrito kan Camarines Sur asin majority floor leader kan SP kasunod man kan mga pahayag sa PBN-TV/DZOK FM ni Vocal Trexie Clemente kan premir distrito kan CamSur na pig-short cut an pagkaka-aprubar kan inuutang kan Capitolio Provincial sa Land Bank of the Philippines (LBP) nin huli ta dai na nag-agi sa first reading asin mayo nang nangyaring committee hearing mantang mayoria kan mga miembro kan SP na kaalyado kan gobernador.

Majority sinda mayo kaming magigibo pinasar na ninda an resolusyon alagad dai ako nagpirma, sabi pa ni Clemente.

Sinabi pa saindang pigcuestion kun saen gagamiton an P650-M, ano an mga proyectong padudumanan mantang naghapot man si Vocal Nelson Julian kun ano na si status kan dating utang. Kabale pa sa kahapotan kun pera asin saen nagdalagan an income sa Gota Beach.

Alagad sinabi pa ni Naval anas sana mga kahapotan mayo man nin objection sagcod na dagos nang naaprubaran.

Saiya pang piglinaw an Gota Beach asin CWC bakong economic enterprise buot sabihon an income digdi nalaog sa general fund.

An mga na presente sanang vocal na mga nasa oposisyon sa deliberasyon sa pag-aprubar kan uutangon kan provincia iyo sinda Vocal Ruperto Alfelor kan Rinconada district asin Vocal Trexie Clemente kan premir distrito mantang sinda Vocal Awel Llaguno asin Vocal Jayjay Pilapil kan Partido district parejong awsente.

An uutangon sa bangko gagamiton sa mga minasunod sa rehabilitasyon kan 86 units Cabanas/Cubins sa Gota Village, Caramoan CamSur na nagcacantidad nin P147 milyon; konstruksyon kan GSO warehouse sa Capitol Complex – P22 milyon; konstruksyon kan Capitol Employees Canteen and Event Center – P31 milyon; konstruksyon kan CamSur Meeting and Events Center – P95 milyon; IT Bldg. Interior Furnishing – P22 milyon; Suction Dredges for Bicol River Rehabilitation/Dredging – P145 milyon; procurement of Tetra Packaging and Processing Equipment for CSur Trading Hub – P175 milyon; asin Procurement of IT Bldg Furniture and Fixtures – P13 milyon.

Sa mga nakalistang uutangon kan gobierno provincial, sinabi ni Vocal Julia an ekipahe sa pagdraga kan Bicol river iyo an may pakinabang alagad an iba cuestionable.