P8.2-M na droga nakumfiscar kan PNP

Apesar na sunod-sunod na si operasyon kan Naga City Police Office (NCPO) contra sa ilegal na droga kan 2023 alagad nagpapaheling na talamak pa sa ciudad an droga matapos makakumfiscar nin maabot sa P8.2-M na shabu sa ginibong buy-bust operation sa C5, Brgy Mabolo, Ciudad nin Naga kan Domingo, Enero 7, 2024.

Silencio an dating bantogan na transaksyon sa droga sa Sitio Sagrada Familia sa Barangay Peñafrancia alagad sa premirong operasyon ngunian na Enero 2024 tolong mga dayuhan na sinda Jamel Daligdig y Delfin, sarong high value individual, Sobranel Paycana asin John Carlo Paycana y Onruba gabos taga Cabuyao, Laguna an natalikop kan pigsarong elementos kan RPDEU5 Team Albay, Naga asin Camarines Sur kaibahan an Police Station 5, NCPO asin PDEA sa operasyon alas 9:36 na aga.

Nakumfiscar sa mga suspek an doceng pakete nin shabu na igwang gabat na 1,210 gramo.

An operasyon kumpleto kan grupo nin mandatory witness mantang si natipon na evidencia nasa kustodiya kan Police Station 5 kan NCPO para sa saindang disposisyon.

An mga suspek nag-aatubang na nin caso sa ilegal na droga.

Saludo si BGen Andre Dizon, Acting Regional Director kan Bicol sa dakulang akumplisimiento kan mga operatiba asin sarong lakdang kan mga awtoridad na dagos-dagos an mga awtoridad sa kampanya laban sa ilegal na droga.

Tolong mga nadakop sa ilegal na droga (naka-itum na t-shirt) yaon na sa kustodiya kan NCPO. (PNP Kasurog Bicol)