P9.7-M na marijuanana-kumfiscar sa CamSur

Milaor, Camarines Sur --- Natalikop an sarong 21 anyos na lalaki kan mga awtoridad na may stock nin maabot sa cantidad na P9.7-M na marijuana sa ginibong drug buy-bust operation mga alas-8:40 nin banggi kan Hulyo 15, 2025, sa sona dos, Barangay Maydaso sa banwaan na ini.

An nadakop na suspek nginaranan na Alias ‘‘Ray’’ kan magpabakal nin sarong patos na sarong kilong marijuana sa sarong naka-sibilyan na pulis na nagcacantidad nin P10,000 na gamit an mga P500 bill. An suspek nag-eerok sa barangay Sta Cruz, Ciudad nin Naga na kabale sa mga pighahanteng na envuelto sa ilegal na actividad sa CamSur.

Maabot sa 80.1 kilo an nabawing pigtutubodan na marijuana mantang an suspek sinangatan nin caso sa corte huli sa pagbalga kan Acta Republica 9165.

An operasyon pinangenotan kan grupo kan Regional Drug Enforcement Unit, MPDEU kan Milaor Municipal Police Station, sa koordinasyon sa Regional Drug Enforcement Agency (PDEA) asin PPO Camarines Sur.

Sa ginibong imbentaryo kan mga nabawing mga evidencia yaon an presencia kan mga testigos, mientras na pigdodocumento sa paagi nin Alternative Recording Devices (AEDs).

Si Bicol PNP regional director BGen Andre Dizon tolos man nagpalayog nin komendasyon sa mga envueltong apprehending officers nganing mabongkag an sindicato sa droga sa provincia.

Ini sarong dakulang akomplisimeinto matapos mabawi an dakulang cantidad nin ilegal na droga.

An jefe kan Bicol PNP nag-orden na pararumon an imbestigasyon nganing masusog kun saen an pighahalian kan marijuana.

Pigtutubod na pwedeng isuplay sa Ciudad nin Naga asin sa mga banwaan sa Camarines Sur an ilegal na droga kun dai natalikop kan mga awtoridad an suspek huli sa kooperasyon kan mga informente o residentes.

An lokal na gobierno kan Milaor, CamSur tolos man nagpaabot nin komendasyon sa Milaor MPS asin grupo kan mga awtoridad nganing madakop an suspek.

Mga na-kumfiscar na marijuana na nagcacantidad Php9.7-M kan grupo nin mga awtoridad sa Milaor, Camarines Sur. (Milaor MPS)