P952K NIN SHABU NAKUMFISCAR: Babaeng tulak nin droga sa CSur nahulog na sa kamot kan PNP

Saro sa pigtutubodan na haloy nang envuelto sa pagtulak nin ilegal na droga sa Canaman asin pagtaraid na banwaan sa tercer distrito kan Camarines Sur an nahulog na sa kamot kan pinagsarong fuersa kan Bicol PNP kasunod sa pagkakakumfiscar sa dorogistang babae an shabu na nagcacantidad nin P952 mil sa ginibong buy-bust operation sa Zona 6, Brgy. Baras, Canaman, CSur.

Sa entrevista ki Police Capt. Bernie Ondecimo, jefe de pulisya kan MPS Canaman, kabale sa operasyon iyo an PNP CamSur, PDEA ROV, ODRDO-RPDEU-5, saka an saindang tropa na ginibo mga alas 7:40 ni banggui kan Martes, Marso 25, 2025 asin nadakop an suspek na nginaranan sanang ‘‘Jenny’’, 45 anyos kan Baras, Canaman.

An suspek na detinido na sa selda sa MPS Canaman, nag-aatubang na nin caso sa corte huli sa ilegal na droga.

Sa imbestigasyon kan PNP an dakulang droga hale pa sa suplay sa Manila alagad dai na pigbuyagyag kan mga awtoridad kun arin na grupo nganing dai na matarog an saindang imbestigasyon asin sunod pang operasyon.

An Bicol PNP padagos na pinapakusog an saindang kampanya laban sa droga sa cooperasyon sa PDEA Bicol asin iba pang ahencia nin awtoridad saka lokal na gobierno. Kabale sa saindang ginigibo iyo an intelligence operation na dapat iguang cooperasyon an mga residentes asin opisyales de barangay.

Hinagad pa kan mga awtoridad sa publico na maging marikmat sa pagmasid sa mga ginigibong ilegal na actividad sa saindang lugar.

Babaeng tulak nin droga dakop sa Canaman, Camarines Sur. (Canaman MPS)