Paaram David Aguila Dollano, 59

Pambihira an broadcaster na piglalanatan bako lang an programa kundi an saiyang enterong pagkatao.

Si David Dollano, popular bako lang sa aire kundi maski sa luwas kan announcer’s booth arog kan bulangan asin sa mga coffee shops, binawian nin buhay sa edad na 59, dai ngani naka senior huli sa helang sa kidney.

Tolong taon na nag-dialysis, tolong beses sarong semana pero nakaka-programa pa aga-aga, amayon pati mag-duty, duwang oras bago magpoon an programa. Pag-abot sa estasyon andam na an bareta pati tsismis.

Sabi kan saiyang agom na si Melba Chavez alas 4:00 mata na, sige an pan-apod sa mga amigo/amiga niya.

Labing tolong dekada sa radyo kaya naguin bantugan na marhay bilang primetime announcer poon sa DZDR, DWRN, asin DWLV-AM.

Kan 1994 kinua siya kan Radyo Mindanao Network bilang primetime announcer sa DWNX, an primerong FM station sa Bikol na may AM programing.

Palibhasa an taga-Naga asin taga-Camarines Sur baraguhon biglang naguin popular an saiyang programa lalo na kan iintroducir niya an Chika sa Radyo bilang original na tsismoso kadakul naogma, kadakul man an naanggot lalo na kun tinatamaan pero mas dakul an paradangog.

Haleng NX nagbalyo siya sa DZGE na pareho an estilo kaya bantugan man giraray. Kan mawara an DZGE nawara man siya sa aire. Pero kan magbukas man giraray an DWLV FM kaibanan sinda na Gil Basmayor Jr., Ervin Borja, Bert Delos Martires asin iba pa.

Alagad pakalihis pirang bulan inimbitaran sinda kan OK FM kan pamilya Cabral kaya pinunan ninda an programang “Riding-in-Tandem”. Pinunan ninda ni Ervin Borja an programang “Riding -in-Tandem”. Magayon an saindang chemistry.

Maski sa college sa UNC magbarkada na sinda asin “riding-in-tandem” na bilang student leaders asin orador. Gulpi na sindang mga taga-hanga sa laog kan campus.

Huring kumpleanyo ni David na guinibo sa residensya nya sa Progress Home, Canaman CSur kairiba an nagkapirang mga dayupot na mga amigo

Kan nasa radyo na sinda dakul man giraray an mga taga-hanga bako lang mga juvenes asin estudyantes kundi maski arin sa sector pati mga gurang.

Si David ang may pugol kan “Tsismis is my Business” na dakul an para-antabay bako lang sa Naga kundi sa enterong Bikol, enterong nasyon asin ibang parte kan kinaban huli sa Facebook livestreaming.

Kaya lang duman naman nagpoon na nagkahelang si David sa bato na kinaipuhan mag-dialysis. An problema pati ta si David habong magpa-kidney transplant ta habo siyang bugtakan nin kidney hale sa kiisay man sa tolo niyang aki. “Magadan na lang ako habo kong ma-inaan nin parte kan hawak an arin man sa sakong mga aki”, sabi niya sa pamilya asin mga barkada.

Kan pwede nang mag-transplant asin handa na an mga amigo na magtao nin dakulang pondo para sa operasyon asin sa pambakal nin kidney hali sa ibang tao na bagay para saiya saka man nagka-Covid asin pigbawal an kidney transplant ta pigtawan atensyon si pagbulong kan si may mga helang nin Covid-19.

Nagkataon man pati na biglang binawian nin buhay an saiyang numero unong taga-hanga an mismong may saderi kan OK FM/PTV 5 kaya dai nguna natawanan nin bagong kidney.

Kan magpara-luya na siya habo na lugod magpabulong, pinundo an dialysis asin duwang semana siya nagpa-hingalo sa harong pero habo nang magpa-doktor ta preparado na daa siya sa ika-duwang buhay.

Si David Dollano kangudan sa magturugang pero mapinadangat sa pamilya magpoon sa ama sagkod ina asin mga tugang asin mga partidaryos. Si Artero Dollano an saiyang ama kan nabubuhay pa minalakaw haling Abella pasiring sa DZGE sa Baras, Canaman maheling lang an saiyang aki.

An mga tugang niyang mayong trabaho ikinokolukar niya--- may sa City hall, may sa Capitol. An tolo niyang mga aki napatapos niya sa colegio bako lang dahil sa trabaho sa radyo kundi huli sa higos asin diskarte.

Sa mga ultimong aldaw niya sa kinaban kun nagdu-duty siya sa estasyon pig-aaralsa na lang siya sa pagsakat sa announcer’s booth pero kun dangugon mo sa aire huna mo mayong mati. Makusog pa an boses, kompleto pa an mga detalyes kan mga bareta, pati tsismis (dai lang aram kun siisay an tinutumbok), yaon pa an pa-konswelo o sense of humor, yaon pa an purong Bikol na saiya lang madadangog asin an pitik sa mga gusto niyang patamaan.

Idto palan nagpopoon na siyang magluya sagkod magtalikod na sa kinaban kan Mayo 20, 2021.

Bako lang siya mapinadangat sa sadering pamilya kundi sa pamilya kan agom asin panugangan, sa kapwa taga-radyo orog na sa daing gayo sinuswerte sa hanapbuhay.

Kun mag-celebrar siya nin kompleanyo kada Hunyo 27 sa saiyang harong sa Progress Homes, Canaman perming gulpi an tao. Mga kristo sa bulangan, mga para-inom, mga reporter kan ibang estasyon, mga politiko, mga negosyante asin mga amigo intimo.

Kaya kan siya bilaran dyan sa St. Peter sa Tabuco, Naga City, tolong aldaw na pano an funeraria asin lalo na kan siya ilubong sa Santo Nino Memorial Park gulpihon si nagturunga bako lang sa simbahan kundi orog na sa kamposanto baku lang hali sa Naga kundi haling Calabanga, Bula, Canaman asin iba pang mga hararayong lugar.

Mayayaman saka kinapobrehan presente, nagpahayag kan saindang pakikidumamay sa pagtalikod sa kinaban nin sarong pambihirang broadcaster na sagkod ngonyan saindang piglalanatan.