Padagos nangyayaring pagbalga saderetso humano sa Bicol, kinundenar

Kinundenar kan Karapatan Bikol asin BAYAN Camarines Sur an padagos na nangyayaring human rights violation sa Bicol sa laog na kan labi sa tolong taon kan presenting administrasyon ni Ferdinand R. Marcos Jr.

Sa ginibong protesta kan grupo sa Plaza Oragon kan Ciudad nin Naga sa komemorasyon kan ika-77 International Human Rights Day kan Deciembre 10, 2025, sa saindang listahan nag-abot na sa 322 an mga insidente nin mga pagbalga sa deretsong pang tawo.

Alagad nagsakat na sa 917 an mga caso an saindang na-idocumento na kinababalihan kan 26 na biktima sa extra-judicial killings, 3 biktima nin pagdudukot, 25 mga detenidong pulitikal, 226 na caso nin pantatakot, 97 caso nin pamumuersa, 82 na caso sa red tagging, 74 caso na pagbalga sa deretso nin pag-organisa, 52 na caso na paggamit kan mga militar o pag-atake sa mga sibilyan/pampublikong pasilidad, 47 caso nin ilegal na pag-aresto, 37 caso nin pagbalga sa deretso sa press freedom. 30 caso sa fuersahan na paglaog sa residencia, 28 caso sa deretso laban sa kababaehan asin dakul pang caso na kadakle envuelto an soldados kan gobierno.

Namumundo an grupo apesar kan mga nangyaring halangkaw na caso sa mga human rights violation sa nagtalikod na administrasyon ni Presidente Rodrigo Duterte alagad dai man nagbabago sa presenting administrasyon.

An ginibong actividad pigparticiparan kan iba pang progresibong grupo hale sa limang congressional district kan Camarines Sur mantang igua man kabaing na protesta sa ibang provincia kan Kabikolan.

An Human Rights Day pig-cecelebrar internasyonal cada Deciembre 10. An petsa napili komo onra sa United Nations General Assembly kan Deciembre 10, 1948.