Padyak, tricycle, habal-habal dapat irehistro na sa LGU
Nagpaluwas na nin Executive Order No. 001 si Acting Mayor Francis Belen kan Pili, Camarines Sur na ‘‘mandatory’’ na sa mga padyak, habal-habal, asin tricycle na magpa-rehistro sa LGU mantang tinatawan nin 15 diyas an mga opisyales de barangay na organisaron an grupo kan mga operator asin tsuper kan sinambit na vehiculo.
An EO pinaluwas kan acting mayor kan Viernes, Noviembre 4, 2022 nganing gabos na mga nagkakayod sa mga barangay madaling makua kun envuelto sa ano man na ilegal na actividad sa saindang barangay.
An desisyon kan LGU na mas maging estricto na sa sinambit na mga nagkakayod na mga vehiculo matapos kan makangerat na krimen sa 18 anyos na senior high school student na nakuang bangkay kan biktima sa maduot na lugar sa Cadlan, Pili, Camarines Sur.
An biktima na si Irish Mae Payonga pigpahayag sa imbestigasyon kan PNP na linupigan asin tinakopan sa nguso sagcod na binawian nin buhay asin inapon sa maduot na lugar.
An ibang sektor sa capital town kan Camarines Sur nagpahayag na dapat naging estricto an mga opisyales de barangay nganing obligaron an gabos na padyak na rehistrado sa barangay asin sa LGU alagad ngunian sana naging estricto kun mayo pang nangyaring krimen.
An saiyang bangkay nakua kan Oktubre 28. An suspechado na si Reymark Belleza, 18, nag-ako kan krimen alagad an iba nagdududa na posibleng igwa pang ibang kaibanan na responsable sa sinambit na makangerat na krimen.
Siya sarong para-padyak na dai rehistrado o kulorum.