Pag-adal dapit sa pagbaha sa Naga mawot ipadagos ni Robredo

TANGANING mapinalisaran na an solusyon sa pagbaha sa syudad nin Naga kaipuhan nin bastanteng panahon tanganing pag adalan an waterways digdi.

Marurumdoman kan Oktubre, kan nakaaging taon pigsanop nin baha na dara ni Typhoon Kristine an dakulang porsyon kan syudad.

Kan Lunes nin hapon liwat binaha an nagkapirang mga lugar sa syudad nin huli sa pagbagunas nin uran na nagdurar mga duwa o tolong oras.

Segun ki Alkaldesa Leni Robredo, pigpoonan na kaini an pag-adal sa mga dalan nin tubig sa syudad, katuwang an akademiya, pakalihis lang an pagpara-uran kan bagyong Kristine.

Susug sa resulta, nagtetenir na mahewas an orolay mapadapit sa waterways asin pagbaha sa syudad nin Naga.

Alagad pigtawan-doon ni Robredo na sa presente igwa na ini nin puder komo alkaldesa kan syudad na ipapadagos an pag-adal sa mga departamento na maninigong mag-adal sa waterways sa Naga.

Sa premirong aldaw na pag-asumir sa puesto naglugbo tolos sa tubig baha si Alcalde Leni Robredo nganing mag-inspeksyon sa kamugtan kan binahang 19 classrooms sa Julian Meliton Elementary School sa Barangay Concepcion Grande. An team kan SWMO nag-aksyon tolos nganing mahanapan nin pangharaloyan na solusyon. Pig-osipon ni Principal Apollo Sebello (sa wala) na perang taon na an saindang problema sa baha mayo pang solusyon. (Atty. Robredo FB)