Pag Agom – Desisyon o Destino

MAY KASABIHAN na kun kamo talagang duwa an mag kaka-dagusan, kamo talaga an mag kaka- dagusan maski na an saro saindo naka istar sa bulan.

Kun arog kaini an destino ta sa buhay, maski na siguro dae ako nag pa Amerika, mag kaka-dagusan kami kan agom ko.

Arog man lang iyan kan mga sinasabi satuya kan mga gurang kaidto. Kun mangyayari an sarong bagay, mangyayari iyan maski anong mangyari. Sa halipot na tataramon, kun oras mo na, oras mo na.

Makunswelong pag urulayan ining tema manungod kun desisyon ta o destino ta an pag aagom. May mga nagtutubod na destino asin may mga dae nagtutubod.

SI KUYA Totong mga 76 na an edad ngunian. Pinsan siya kan agom ko. Nag adal siya asin nag tapos nin medisina sa UP. Pagka tapos nin dikit na taon nyang pagka doctor sa Pilipinas, nag paaram siya sa nobya niyang si Josefina na ma pa Amerika siya.

Bago daa sinda mag pakasal ma pa Amerika nguna siya nganing mag padagos kan profesyon niya. Sabi niya babalikan niya tulos si Josefina nganing mag pakasal oras na maka interno siya sa sarong ospital sa Amerika..

Naging medico interno si Kuya Totong sa sarong ospital sa Amerika. Mientras interno siya duman may na bisto siya na saro man na interna – sarong Hudyong babae. Sa madaling istorya nagka gustuhan sinda asin pagka tapos kan pagka interno, asin interna ninda, nagpa kasal sinda.

Haloy na dae nagpuli si Kuya Totong sa Pilipinas. Dae na sinda naghilingan ni Josefina. Pag mati ko may mga ibang bagay na dae ko aram kun tano ta iba si na agom ni Kuya Totong. Pero an sabi sako kan agom ko dae na daa nag agom si Josefina ta nakulgan na maray sa nangyari sainda.

Nag pasiring man sa Amerika si Josefina nganing mag tapos nin ibang kurso. Pagka tapos nin dikit na panahon naaraman kan agom ko na nag laog si Josefina sa sarong kongregasyon nin mga madre sa Amerika.

Base sa istoryang ini ni Totong asin ni Josefina, sa pag hiling ko an desisyon sa pag agom sarong kumbinasyon kan destino sa buhay asin peronal tang desisyon.

An ibang tawo natubod na an pag agom sarong destino saimo.

An iba man natubod na personal mong desisyon an pag agom pag abot kan tamang tawo sa buhay mo sa tamang panahon.

Dakul na mga pangyayaring arog kaini. May mga nag ma madreng babae o basta dae na lang nag aagom – iyo ini an destino ni Josefina.

Igwa man kaidtong tugang si Mama na nagin fiscal sa Sorsogon asin nagka nobya duman. Sabi ni Mama huna daa kang gabos sa pamilya iyo na ito si maaagom kan tugang niya. Pero nagka gerra asin nagka suwayan sinda.

Pagka tapos kan gerra dae tulos nakabalik sa Sorsogon si tugang niya. Mayong nakaka aram kung anong nangyari ta dae na sinda nag hilingan.

Dae na nag agom si dating nobya kan tugang ni Mama. Iyo ini siguro an saro man na destino sa buhay.

Nagin marhay man si buhay ni Kuya Totong maski magka ibang marhay an relihyon ninda kan na agom niya . Nagsisimba si Kuya Totong sa Kristyanong simbahan asin si agom niya sa Hudyong templo. An kondisyon ninda kun lalake an aki ninda masunod an aki sa pagka Kristyano. Kun babae mapapasiring sa Hudyo an pag tubod.

May duwang aki si Kuya Totong. Si matua nagin Pastor sa sarong Kristianong simbahan sa Canada. Si saro nagaadal nin medisina sa Pilipinas. Matatapos siya ngunian na taon.

Kan kaulay mi si Kuya Totong kan Krismas sabi niya habo na mag balik sa Amerika si aki niya sa Pilipinas. Gusto daa gamiton an pagka doctor niya nganing mag mission sa Pilipinas. May nobya siya sa Amerika na nag hahalat.

Sa mga nag babasa kan temang ini sigurado po may mga aram man kamong mga istorya manungod igdi sa pag agom.

Ano an pag hiling nindo sa pag agom – desisyon o destino?