PAG-ANDAM SA MGA BULAN NIN BAGYO: NFA bastante sa bagas

Ciudad nin Legazpi --- An National Food Authority (NFA) nagpaseguro na nin awad-awad na stock nin bagas sa mga bodega sa anom na provincia kan Kabikolan bilang food security sa natatadang tolong bulan kan 2021 na iyo an panahon kan paglaog nin mga bagyo.

Sa ngunian igwang 13,662 cavan nin bagas asin 228,978 na cavan kan paroy na binakal sa mga paraoma alagad padagos pa an saindang palay procurement nganing bagason asin makadagdag sa food security sa anom na provincia kan rehiyon.

Si Jaharah Sy Pavilando, opisyal na parataram kan NFA Bicol nagpahayag sa Bicol Mail na saindang prioridad sa ngunian iyo an palay procurement nganing suficiente an saindang stock nin bagas ano man na oras magkaigwa nin calamidad.

Mayo na sa mandato ninda an pag-suplay nin bagas sa mga mercado envez seguridad sa pagkakan asin ciertohon na igwang awad-awad na suplay sa mga bodega.

An Acta Republica 11203 na mas midbid sa Rice Tariffication Law iyo an naghale sa saindang mandato nganing magsuplay nin bagas sa mga mercado asin tinao na sa mga darakulang negosyante na iyo ngunian an nagdidikta kan presyo.

Huli kaini, halangkaw man giraray an presyo kan bagas alagad kabaliktaran sa paglaom kan consumedores asin paraoma na mababa an presyo.

An RA 11203 tinawan nin buelo an mga rice traders na mag-angkat nin bagas sa ibang nasyon asin hinale na sa NFA an apektado digdi iyo an consumedores sa mahal na presyo kan bagas.

An resulta yaon na sa kontrol kan mga negosyante kun pera an dapat an presyo kan bagas sa mercado.

Sa ngunian nagcacantidad nin P35.00 hasta P40.00 asin igwa pang mahal digdi depende sa klase kan bagas.

Si Silvestro Bonto, lider nin mga paraoma sa Bicol nagsabi na saindang kinukundenar an Rice Tariffication Law kan administrasyon ni Presidente Duterte huli ta iyo an nagpababa kan presyo kan paroy kan mga paraoma.

Sa ngunian an dalagan kan presyo kan paroy sa mga kumprada nag-aabot na sana sa P12.50 hale sa dating P17.00 cada kilo.

Sa procurement program kan NFA nagbabakal sinda kan paroy nin paraoma sa cantidad na P19.00 cada kilo alagad kaipuhan alang asin malinig. (dpa)