Pag-arestar sa mga aktibista iinbestigaran na kan congreso

Isusunad na sa congressional inquiry an mga cuestionable pag-arestar sa mga aktibista sagcod na tinatanuman nin mga armas nganing gamiton na evidencia kan awtoridad sa pagsangat nin caso kriminal.

Ini afuera kan pigtutulod ni Albay Congressman Edcel Lagman kan premir distrito kan Albay na kaipuhan nang inbestigaran an mga ginigibong red tagging kan gobierno sa mga aktivista asin abogado.


Si Jenelyn Nagrampa-Caballero, Gabriela’s national vice chairperson nagpahayag sa entrevista kan Bicol Mail sa paagi nin telepono na igwa na sindang enot na pigsangat na petisyon sa mga party list kan Makabayan Block, Gabriela asin Kabataan party alagad nakatalaan nang i-kalendaryo pagbuelta kan sesyon regular kan Congreso sa maabot na May 17, 2021.


Kan maagahon kan Mayo 2, 2021 duwa naman na aktibista sa Bicol an inarestar asin tinanuman nin armas siring kan badil, granada asin mga gamit sa paggibo nin bomba.

Sa Camarines Sur, dinakop asin tinanuman nin ilegal na mga armas si Maria Jesusa “Sasah’’ Sta Rosa opisyal na parataram kan Jovenes Anakbayan sa saiyang residencia sa Villa Obiedo, brgy. Cararayan, Ciudad nin Naga mga alas 3:00 nin maagahon kan Mayo 2.


Sinabi ni Sta Rosa sa miembros kan prensa sa Naga na mayong katutuanan an akusasyon kan grupo kan CIDG na nag-arestar na nagtatago siya nin mga armas.


Segun sa saiyang osipon, pinalibotan nin mga awtoridad an saiyang pig-eerokan sagcod na pirit na pinaluwas sinda sa laog kan residencia sagcod na fuersahan na naglaog alagad igwa sindang naheling na bag na dara kan mga awtoridad asin idto palang may laog nin ilegal na armas na pigpahayag asin base sa report kan PNP nakumfiscar sa saiyang residencia.


Inako kaini na lider siya kan aktibistang grupo alagad an saindang pagtuyaw sa saltong gawi asin pagpadalagan kan gobierno mga valido asin igwang mga pigbabasehan bilang nasa demokrasya an satong nasyon.


Nagtutubod siya na nangyayari an pang-iipit sa sainda parte kan Anti-Terror Law kan administrasyon Duterte na pigcucuestion ngunian kan mga abogado sa korte suprema.


Sa Albay, dinakop alas 4:00 nin aga kan Mayo 2, 2021 si Pastor Balucio (BAYAN Bicol Spokesperson asin Secretary General kan mga nagpapabistong CIDG hale sa Camp Ola (Michael Abarra).


Pinadapa kan mga awtoridad an mga kaibahan ni Pastor Balucio asin nagkaperang mga staff kan United Church of Christ in the Philippines na kaibanan ninda kan oras na magsakyada an mga awtoridad.


Dai pa nakuntento linabot kan mga awtoridad an service vehicle kan simbahan.


An pag-arestar naman sa duwang aktibista igwang pinaheling na search warrant na pig-isyu ni Juez Edgard Armes kan RTC sa Albay na may petsang Mayo 1, 2021.


Kinukundenar kan Bagong Alyansang Makabayan Camarines Sur an ginibong pag-arestar asin pagtanum nin mga armas asin pasabog ki Sta Rosa asin Pastor Balucio.


An insidenteng ini kaparejo man sa ginibong pagtanum nin mga evidencia sa journalist na si Lady Ann Salem asin trade union organizer na si Rodrigo Esparago.


KASONG MURDER VS SA 2 AKTIBISTA BINASURA


Magigirumduman kan Septiembre 2020, inarestar an saindang lider kan BAYAN Camarines Sur na si Nelsy Rodriguez asin pigsasahot na envuelto sa pagkaka-ambush sa duwang soldados kan gobierno sa Labo, Camarines Norte.


Kan Hulyo 2020 an duwang aktivista sa Camarines Sur inarestar man kan mga awtoridad na kinasohan murder kan Municipal Police Station sa Ragay, Camarines Sur na pigsasahotan sa paghihipa sa duwang miembros kan militar sa banwaan kan Ragay kan Mayo 13, 2018.


Alagad dai man naprubaran an akusasyon huli kan kawaran nin evidencia base sa pinaluwas na resolusyon petsado Febrero 26, 2021 kan Provincial Prosecutor kan Camarines Sur.


Sa PNP Bicol, sinabi ni spokesperson Major Malou Calubaquib na lehitimo an operasyon kan mga awtoridad. (DPAureus)