Pag Bomba sa Iran

AN SABI KAN si mga dating presidente kan America mag poon ki Clinton abot ki Biden, an Iran daa dae dapat tugutan na magka igwa nin nyuklar na armas.

Pero maski na ngani arog kaini an mga tanid o sinabi kan mga naka aging presidente sa America, padagos pa si pag gibo nin nyuklar na armas an Iran. Padagos man an mga pag kurahaw kan mga opisyales kan gobierno ninda duman na “Death to America!” “Death to Israel!”. Bantog man sa enterong kinaban na ginagamit kan Iran an mga terorista sa pag laban sa America asin Israel. An ambisyon ninda iyo an mawara sa mapa kan mundo an Israel.

Kan naka aging Abril nagpadarang surat si Presidente Trump directamente sa pamayo kan Iran na si Supremo Ayatollah Ali Khamenei. Sinabihan niya an Iran na pundohon na ninda an pag gibo nin mga nyuklar na armas. Pig tawan niya nin tanid an Iran na igwa sindang 60 aldaw na pag-isipan ini asin kaipuhan mag urulay sinda manugod sa katuninungan. Kun dae, ma papaduman ining sitwasyon na ini sa militar na paagi. Gusto ni Trump ipadagos an diplomasyang mga negosasyones. Pero dae si Trump pig intindi kan Iran. Padagos si pag gibo nin armas na nyuklar an Iran.

ALAS DOSE NIN MATANGA kan Enero 21; nag kaka pirang mga eroplanong pang gera an nag tiripon sa sarong baseng militar sa estado kan Missouri sa America. Mga pig-aapod na B-2 Bunker Buster Bombers an mga eroplanong ini. Nag dadara nin mga pinaka makusog na mga bomba na nakaka tagos sa mga lugar na harararom arog kan mga nasa irarom kan bukid. Kada eroplanong ini may darang duwang bomba na nag titimbang na labing 1,3607 kilos kada saro.

Sarong grupo kan mga eroplano nag pasiring sagin sa direksyon nin Pasipiko sa destinasyon nin Guam. Saro ining taktika nganing ma misdireksyon an mga espiya kun igwa man.

Si sarong grupo man na pitong B-2 na eroplano silensyong nag pasiring sa Atlantiko. Si Presidente Trump asin nagkaka pirang tawo lang an nakaka-aram kaini.

May duwang piloto lang sa kada eroplanong ini. Sarong babeng piloto an kaiba duman sa grupo. Aabuton sindang 18 oras na byahe pasiring sa destinasyon asin 18 oras na pabalik.

Pagkatapos nin 18 oras na pag layog kabali na si pagpa gasolina ninda mientras nag lalayog, nag laog na sinda sa teritoryo nin Iran na mayong naka aram. An mga eroplanong ini dae nahihiling sa radar. Sinabayan man sinda nin mga ibang saradit na eroplanong pang gera kan America na mag antabay sainda. Igwa man na nag antabay na sarong submarine sa haraning dagat na may mga missile na ma tabang sa pag atake.

Dakulang sorpresa si inabot kan Iran. Mayong na enkwentrong kalaban sa pag bomba ninda. Tulong lugar nin mga plantang nag gigibo nin mga nyuklar an tinamaan kan mga bomba ninda. An pinaka dakulang planta iyo itong nasa lugar kan Fardo. Nasa irarom kan bukid ining plantang ini pero eksakto gabos si tama ninda asin inabot kan sunod-sunod na bomba si planta sa irarom kan bukid. Igwa pang duwang planta na inaapod na Isfahan asin Natanz an tinamaan kan mga bomba. Sinabayan man ining mga pag bomba kan mga missile na hali sa submarine sa dagat asin mga bomba na hali duman sa mga saradit na mga antabay na eroplanong pan laban.

Pagka tapos nin 30 minutos, tapos na sinda kan saindang mission.

Kan naka balik na si mga B-2 Bunker Busters sa America, nag anunsyo na si Trump sa mga tawo na epektibo asin nag aser si plano ninda. Na destroso na daa si mga plantang nyuklar kan Iran.

Segun sa bareta mga 125 na eroplanong pang gera kairiba na si mga B-2 an kabali sa mission. 14 mga Bunker Busters na mga bomba an nag tama sa mga planta, 2 dosenang mga missile na hali sa submarine, asin 75 na mga iba ibang missile na hali sa ibang eroplano.

Sa ngunian, dae naka bweltada an Iran. Na sorpresa sinda sa pangyayaring ini. Kan sarong aldaw nag deklara nin “Fatwa” si Ayatollah kan Iran kontra ki Trump asin ki Netanyahu na pamayo kan Israel. An fatwa sarong legal na opinyon na garo man lang sentensya na gibohon gabos kan mga tauhan ni Ayatollah nganing mapa tumba si Trump asin si Netanyahu.

Sa mga panyayaring ini nagka igwa kita nin dikit na katuninungan ta na destroso kan America si mga nyuklar kan Iran. Pero aram ta gabos na dae sinda ma pundo. Ma padagos otro sinda sa pag gibo nin mga armas kontra sa America asin sa Israel.

Pero para mientras, tulong bagay an pwedeng gibohon kan Iran ngunian. Atakehon an mga baseng militar kan Amerika sa Middle East. Atakehon itong mga konsulado o mga diplomatikong mission kan Amerika asin mga kakampi nin Amerika. Pwede man ninda lagan nin mga mina an Strait of Hormuz na ina-agihan kan mga komersyal na barko.

Maski na ngani gusto ni Trump na matapos na ining karibukan na ini, diskumpyado si Ayatollah ki Trump. Lolokohon lang daa sinda kan Amerika. Kaya garo malawig pa ining labanan na ini.

Delikadong marhay an mga nangyayari ngunian sa kinaban. Kaipuhan ta nin dakul na pangadye na dae magka gera. An resulta ngunian kun magka gera talagang terible ta puro nyuklar na an kapot kan mga makukusog na nasyon. Maski mag sain kita, maa-apektuhan kita.

Kan sarong aldaw nag laog lang sa isip ko na dapat siguro bisitahon ni Santo Papa an mga nasyon kan Iran, China, Russia, America, Ukraine, Gaza, asin mga maribok na lugar imbes na mag para istar siya sa Vatican. Dakulang tabang ini para sa katuninungan kan kinaban. Saro siguro ining sulosyon.

Man laen-laen an pag tubod kan tawo pero natubod ako na an pag pangadye makaka tabang sa mga problema kan kinaban ngunian.

Kun dae, an sitwasyon ta ngunian garo baga saro kitang posporo. Sarong sabrit lang ma-laad na tulos.