Pag-imbargo sa P7.4-M na shabu sa Canaman dakulang puntos vs droga

DAKULA an nagin kawaran sa lado kan mga dorogista sa Canaman, Camarines Sur an pigtutubudang shabu na nagkakantidad P7.4 million na pigkumpiskar kan mga autoridad durante kan buy-bust operation kan Sabado nin banggui, Setyembre 23.

Ini an pigkunpirmar sa Bicol Mail ni Mayor Nelson Legaspi kan kaolayon manungod sa binultong shabu na narekober sa Flamingo St., RJ Village, Barangay Haring banda ala-7:00 nin banggui kan nasambit na petsa.

Arestado sa operasyon iyo sinda Noel Obias Francisco III, 52-anyos na may agom asin residente kan Flamingo St., RJ Village, Barangay Haring, Canaman, Camarines Sur; Dexter Brazal. 49-anyos na soltero kan Barangay Sto. Tomas, Magarao, Camarines Sur asin si Raymond Madera, 42-anyos kan Barangay Dayangdang, syudad nin Naga.

Narekober kan mga autoridad sa mga suspetsado an 28 sachets nin pigtutubudan na shabu may timbang na 1,075 grams asin saro pang sachet nin pigpaalang na dahon nin marijuana.

Segun sa alkalde, an mga illegalidad na pig-embargo kan pulisya sa lugar iyo na an may pinakadakulang kantidad, pinakaenot sa historya kan banwaan.

Pigsabi pa ni Legaspi, mas magigin matoninong an saiyang banwaan kun dagos nang mapuho an illegal na droga sa Canaman.

Dugang pa kan alkalde, dae na mabilang an surunudan na pagkakadakop sa drug peddlers sa saiyang lugar huli na man sa espwerso kan pulisya lokal katuwang an mga barangay officials sa pagmata sa mga barangay.

Aminado si Legaspi na nagin depisil an operasyon kan Sabado huli na man sa lugar na pigkokonsiderar bilang lagbasan pasiring sa Barangay Bagumbayan Norte, Calauag asin San Felipe, gabos sa syudad nin Naga.

Istorya kan alkalde, haros mayo nin botante an nagruluwas sa mga harong sa lugar kan ini yaon pa sa proseso nin pagkampanya para sa kargong pagka-alkalde kan banwaan.