Pag-uktaba kan BSKE posibleng makaabot pa sa SC-Comelec

Nagtutubod an Commission on Election dawa aprubado na sa congreso an pag-uktaba kan nakatalaan na Barangay, Sangguniang Kabataan Elections (BSKE) pwedeng darahon pa an isyu sa Korte Suprema (SC) nganing ibasura an pag-uktaba naman kan BSKE.

Ini an mga pahayag ni Atty. Maico Julia Jr., Election Officer kan Ciudad nin Naga sa tahaw kan pagcontra kan election lawyer, Atty. Romulo Macalintal na hinagad na sa Senado na dangonon an pagdangod kan isyu kun tano ta dapat ipadagos an pirilian sa BSKE sa Noviembre 2, 2026.

Idadakit an nakatalaan na BSKE hale sa sinambit na petsa envez gibohon sa Noviembre 2028 nganing magkaigua nin pirilian cada ika limang taong.

Alagad nagtutubod si Julia maging si Macalintal na dapat idagos na an BSKE mientras na kun i-uuktaba pakatapos na kan termino kan mapipiling opisyales kan Barangay asin Sangguniang Kabataan.

An House Bill No. 10971 na dai palang nahahaloy pinasar asin pinaboran kan nasa 300 na miembros kan Camara-Baja yaon na sa Senado nganing saindang tukaron.

Sinabi sa surat sa senado ni Macalintal na sarong ‘‘transparent semantic maneuver’’ an pagbago kan termino hale sa apat nganing ipako sa limang taon.

Nagtutubod an ibang mga congresista na nasa likod kan pag-ukta na dakulang bagay an limang taon kan mga opisyales kan barangay asin SK nganing mag-asenso an Barangay alagad an ibang sektor na nagcocontra dahilan sana nganing dai idagos an BSKE.

Sa ngunian dakul nang mga asperante an nagparalibot sa barangay pilang saindang preparasyon nganing amay mabisto sa tahaw kan nagrarani nang pagsangat nin certificate of candidacy sa Comelec sa Septiembbre 28, 2026 hasta Oktubre 5, 2026.