top of page

PAGASA CSur: El Niño nauulang kan habagat

Normal an mga nangyayaring pag uran-uran huli sa habagat alagad an El Niño nagpopoon palang asin mantenido sagcod pa sa masunod na taon.


Si Fred Consulta jefe kan Philippine Atmospheric and Geophysical Astronomical Services Administration (PAGASA) sa Camarines Sur nagpahayag kaini sa entrevista kan Bicol Mail sa paagi nin telepono na sa tahaw kan mga pagtubod na tapos na an El Niño mientras padagos na an mga pag uran alagad apektado sana huli kan habagat.


An homa naman kan duros habagat iyo an posibleng paglaog nin duwang bagyo ngunian na Hunyo sa Philippine Area of Responsibility (PAR).


Piglalaoman kan PAGASA huli sa epekto kan El Niño maluya an manga pag-uran sundo sa huring cuarto ngunian na taon asin an makuring init mamateon sa enot na cuarto kan 2024.


Sa pinaluwas na projections kan PAGASA, Hunyo hasta Hulyo, normal an ibabang mga pag uran sa nasyon. Alagad posibleng mateon an grabeng init nin panahon sa Agosto.


An makuring tag-init nurong taon maresulta nin pag-alang kan daga o kaomahan huli ta kulang an mga pag uran mantang labo-labong init huli kan El Niño, sabi pa ni Consulta.


Sinabi pa an sinambit na calamidad nangyayari cada ika-duwa hasta pitong taon kun an kadagatan sa katahawan kan Pacific Ocean nag-iinit an temperatura kan dagat sa bakong normal na ‘‘above normal sea temperature’’.

Garatak na omahan kan mga nakaaging El Nino posibleng mangyari sa sunod na taon huli kan grabeng init. (DA)


Epekto pa kaini, kun padagos na nag-iinit an temperatura an duros kaiyan nagluluya pasiring sa Filipinas na naresulta na kulang an nabibilog na panganuron na causa nin kulang na pag uran.


Huli kan El Niño, piglalaoman na mas makusog an mga bagyo lalo na sa paglaog kan panahon nin habagat. An mas makusog na bagyo puedeng magkawsa nin tubig pagbaha asin pagrasay nin daga.


Sa lado nin agricultura ciertong apektado an mga paraoma, pagsisira asin paghahayopan maging sa salud kan tawo.


Sa pinaluwas na inpormasyon kan Climate Risk Vulnerable Assessment (CRVA 2029) an rehiyon Bicol saro sa puedeng tamaan kan grabeng epekto kan El Niño. (DPA)

Comentarios


bottom of page