Pagbaba kan tarifa sa kuryente nagdedepende sa gencharge

Nagbaba ngunian na bulan nin Agosto 2023 an singil sa tarifa kan Camarines Sur II Electric Cooperative (Casureco II) maging kan iba pang electric cooperative (ECs) alagad nagdepende sa pagbaba man kan generation charge (gencharge) cada Kilowatt hour (kWh) kan power suppliers.

Dai kabali digdi si controvercial na isyu sa kasugoan kan Energy Regulatory Board (ERC) kan Abril 17, 2023, sabi sa paliwanag kan Casureco II sa paagi ni Rinner Bucay an opisyal na parataram kan cooperativa nin electricidad.

Kun dati si gencharge kan mga power suppliers siring kan Masinloc asin Wholesale Electricity Spot Market (WESM) nagdadalagan sa P10.00 hasta P12.00 sagcod naghuros sa P8.00 alagad sa ngunian nagbaba sa P5.00 cada kWh na dakulang bagay an hababang tarifa sa miembros-consumedores.

Sa ngunian nagbaba sa tres pesos si residential rate na cantidad na sanang P7.3172/kWh; sa commercial rate P6.4419/kWh asin sa industrial rate - P5.7212/kWh.

Nakumfirmar kan Bicol Mail sa Casureco I sa Libmanan, Camarines Sur na nagpahuros naman kan singil sa tarifa ngunian na bulan mantang napag-araman sa ibang ECs nagbawas naman sa kaparejong rason.

Dinagdag pa ni Bucay nagparababa si singil kan mga power suppliers kasunod kan barato na si presyo kan imported na oring hali sa halangkaw na presyong 400 hasta 500 dolyar cada metrico tonelada alagad sa ngunian nagcantidad na sanang 100 dolyar cada metrico tonelada.

Pigbuyagyag pa kan Casureco II kan posibleng mangyari kun perang bulan na hababa an singil sa gencharge puedeng mamantenir na hababa an tarifa kan cooperativa alagad kun biglang maglangkaw liwat na ipapasa sa miembros-consumedores.

Kan grabe an init kan panahon huli kan El Niño phenomenon dakula an consumo kan kuryente digdi man nagmamahal an gencharge, sabi pa. (dpa)