Pagbakal P20 nin NFA rice maagi sa sakripisyo

Sakrispiyo sa halabang pila kan piling sektor nganing makabakal nin baratong presyo nin bagas sa cantidad na P20.00

Ini an nangyayari ngunian sa sanga kan National Food Authority sa Camarines Sur maging sa iba pang provincia sa Kabikolan.

Awtorisado na an mga lokal na gobierno na maglaog sa contrata sa NFA asin Department of Agriculture nganing magpabakal kan baratong presyo kan bagas sa lindong kan ‘‘benteng bigas program’’ ni Presidente Ferdinand Marcos Jr. alagad an problema kadakli kan LGUs dai interesado sa dai maaraman na rason.

Digdi sa Camarines Sur bilang sanang LGUs an nagsusuporta sa ‘‘benteng bigas program’’ siring kan Nabua na nagpapabakal na kan P20 na bagas hale sa bodega kan NFA. Igua man sa ibang provincia kan rehiyon alagad limitado sana.

Alagad sa NFA Camarines Norte naglilibot sa mga barangay.

An ibang LGUs an dahilan na dai sinda naglaog sa contrata huli ta sakripisyo sa mga parabakal na limitado sana sa sampolong kilo.

Sa lindong kan programang ini an awtorisado sana na makabakal iyo an mga sektor nin paraoma, mga tsuper kan sektor nin transaporte, senior citizen, PWDs asin iba pa na kaipuhan magdara nin balidong ID.

Mayo pang paliwanag an NFA kun iguang seguradong food security nganing gamiton sa panahon nin calamidad sa tahaw kan padagos an pagpabakal kan baratong presyo kan bagas.

An Camarines Sur iyo an provincia sa Bicol na may halangkaw an produksyon nin bagas alagad mahal an presyo sa mga mercado mantang barato man an bakal kan paroy sa mga paraoma orog na kun panahon nin aranihan.