Pagbalyo kan BFAR Bicol sa Albay mayo pang fondo
An plano na ibabalyo an opisina rehiyonal kan Bureau of Fisheries and Aquatic Resources (BFAR) dai pang talaan kun nuarin marerealisar mantang sagcod sa ngunian mayo pang alokasyon an gobierno para sa konstruksyon kan bagong edificio sa Ciudad nin Ligao.
Igwa nang maabot sa dos mil metros cuadrado lote an lokal na gobierno kan Ciudad nin Ligao na pigdonar sa BFAR alagad mayo pang nakaandam na fondo an gobierno nasyonal.
Ini an mga pahayag ni Noni Enolva, opisyal na parataram kan BFAR Bicol mantang an saindang presenteng opisina rehiyonal sa Banasi, Bula, Camarines Sur sagcod sa ngunian mantenido man giraray.
Si Albay 3rd District Congressman Fernando Cabredo iyo an nasa likod kan plano na halion an saro naman na opisina rehiyonal sa provincia nin Camarines Sur nganing ihubo sa Ciudad nin Ligao, sakop kan saiyang congressional district.
An ibang mga opisyales lokal kan LGU Ligao nagtutubod na kun daing pandemya posibleng narealisar na an pagbalyo kan ahencia mantang an pigtawan nin prioridad kan gobierno nasyonal iyo an pagpabulos nin fondo sa coronavirus disease.
An sektor nin parasira sa Camarines Sur enot nang nagpahayag nin pag-oponer sa propuesto kan representante kan tercer distrito kan Albay asin saindang hinahalat an magiging aksyon man kan gobierno provincial kan Camarines Sur sa paagi nin resolusyon contra sa planong pagbalyo kan opisina rehiyonal.
Magigirumduman si huring planong ibalyo sa Albay iyo an regional office kan Department of Agriculture alagad dai nangyari sa tahaw kan mga pagcontra kan sektor nin paraoma asin mismo an mga empleados kan ahencia.
Dapat maghiro man an mga empleados kan BFAR regional office na magpaluwas kan saindang manifesto laban sa planong pagbalyo sa Albay.
An mga paghakot kan mga opisina rehiyonal hale sa Camarines Sur pasiring sa provincia nin Albay, perang decada na an nakaagi pigpahayag na si dipuntong Senador Dominador Aytona na taga provincia nin Albay iyo an nasa likod.
Ini matapos gibohon an Albay na regional center kan Kabikolan. (dpa)