Pagbalyo kan BFAR office sa Albay dapat ibasura
An pederasyon nin mga parasira sa San Miguel Bay asin lokal na gobierno kan Calabanga, Camarines Sur pusog na nagcocontra sa pagbalyo kan opisina rehiyonal kan Bureau of Fisheries and Aquatic Resources (BFAR) sa provincia nin Albay hale digdi sa Camarines Sur.
An Sangguniang Bayan kan LGU Calabanga nagpasar na nin resolusyon padreno si Consejal Levy Sta Santa mantang yaon digdi sa provincia an mas dakul na naghahanap buhay sa pagsira asin dagdag na gastos sa grupo nin parasira kun may transaksyon nganing magduman pa sa Albay.
Namumundo si Sta Ana kan plano naman na ini mantang dakul na nganing mga opisina rehiyonal hale sa Camarines Sur hinarakot na sa Albay.
Dapat helingon kan gobierno kun panong matatabangan an saradit na mga parasira envez kan milyones pesos naman na gagastoson sa pagbalyo kan opisina rehiyonal, sabi pa kan consejal.
Kun mangyari ini dakulang desventaje sa mga empleados na taga Camarines Sur.
An lokal na Pederasyon ng mga Maliliit na Mangingisda ng San Miguel Bay (PEMMA-SMB), Inc. sa nasyonal Pambansang Alyansang mga Manginigsa at mga Pamunoan ng Organisasyon (PAMPANO), Inc. na pinamamayohan ni Chairman Charlie Capricho nagpahayag na maging an grupo nin parasira na componido kan SMB, Ragay gulf, Lagonoy gulf, asin Lake Buhi dai nagpapabor.
Sinabi pa dapat tawan prioridad kan gobierno an pandemya asin an kabuhayan kan saindang sektor envez kan paggastos sa pagbalyo kan opisina.
An nasa likod kan pagbalyo sa Albay iyo si Director Nelson Bien, na taga Albay asin kun taga Sorsogon naman an director posibleng darahon sa saindang provincia. Kan panahon ni dating director Dennis del Socorro na taga Camarines Sur dai ini nangyari.
An dahilan kan director nin huli ta an Albay iyo an regional center kan Bicol.
Kun gustong gayo ibalyo darahon sa Ciudad nin Naga ta iyo an mas centro, ‘‘prerogative’’ kaya yan kan director na taga Albay, sabi pa ni Capricho.
Kan Febrero 20, 2020, Si director Bien asin an lokal na gobierno kan Ciudad nin Ligao na pinamamayohan ni Alcalde Patricia Gonzales-Alsua nagpirma na sa kasundoan para sa donasyon kan propriedad sa BFAR para sa konstruksyon kan bagong opisina rehiyonal kan BFAR na mamugtak sa dos mil metros cuadrado kumpara sa opisina sa Camarines Sur na nasa mahiwas na tres hektarya.
Alagad an fondo sa proyecto na-igilid nin huli kan coronavirus disease (COVID-19).
An inisyal na fondo para sa konstruksyon kan edificio nagcacantidad nin P10 milyon na yaon na sa General Appropriation Act of 2021.
An desisyon ni Bien na ihubo an opisina rehiyonal kan BFAR nin huli ta maserbe na ‘‘strategic hub’’ sa mga kliyente sa rehiyon Bicol. (DPAureus)