Pagbalyo kan BFAR reg’l office sa Albay mayo nin fondo - sabi

Bula, Camarines Sur --- Naghahanap pa nin fondo an opisina rehiyonal kan Bureau of Fisheries and Aquatic Resources (BFAR) nganing madagos an pagbalyo sa dos mil metros cuadradong lote sa Ciudad nin Ligao kan provincia nin Albay.


Katuyohan kan planong pagbalyo hale sa Camarines Sur bilang pagsunod na dapat an mga opisina rehiyonal kan gobierno namumugtak sa regional center kan Bicol na iyo an Albay asin maparani pa sa ibang mga provincia kan rehiyon.


Ini an mga pahayag ni Nonie Enolva, opisyal na parataram kan BFAR Bicol kasunod kan pagdonar na nin lote kan LGU Ligao asin kamawotan ni Albay 3rd District Congressman Fernando Cabrero na makahubo na sa saiyang distrito an BFAR regional office.


An organisasyon nin mga parasira sa Camarines Sur nagpahayag na milyones pesos an gagastoson kan gobierno sa pagpatindog nin bagong opisina rehiyonal envez na dapat gamiton nalang sa programa sa sektor nin parasira asin nag-aatubang pa sa krisis sa pandemya.


An lokal na Pederasyon ng mga Maliliit na Mangingisda ng San Miguel Bay (PEMMA-SMB) Inc. sa nasyonal Pambansang Alyang mga Mangingisda at mga Pamunoan ng Organisasyon (PAMPANO), Inc. na pinamamayohan ni Chairman Charlie Capricho nagtutubod na dapat antes kan desisyon sa pagbalyo kan opisina kinakaipuhan paagihon man giraray sa konsultasyon asin an plano saindang pigcocontra.


Dinagdag pa ni Enolva na an fondo sa mga programa sa sektor nin parasira sa Bicol dai man gagamiton sa pagpa-construhir nin bagong edificio.


An ibang lider nin mga parasira nagtutubod sinda nin huli ta si BFAR regional director Nelson Bien taga Albay kaya pigmamawot na hakuton digdi asin darahon sa saindang provincia.


Sa Calabanga, Camarines Sur si Consejal Levy Sta. Ana nagpahayag na nagtalaan sinda nin committee hearing sa Sanggunian Bayan nganing aramon sa sektor nin parasira an saindang panindugan na hahakuton na naman an BFAR regional office sa Albay.


Si Capricho kan makaulay sa paagi nin telepono kan Bicol Mail nagpahayag nin pagcontra na ihubo an opisina sa Albay mantang bako lang desbentaje sa mga empleado kan ahencia na taga digdi sa Camarines Sur maging man an sektor nin parasira. (dpa)