top of page

Pagbuelta kan viaje kan PNR tabang sa sektor paraoma

Ciudad nin Naga --- Si Consejal Vidal Castillo, pamayo kan Committee on Market Affairs sa Sangguniang Panlungsod nagpahayag na an pagbuelta kan viaje kan Philippine National Railways (PNR) sa rutang Naga asin Ciudad nin Ligao mapauswag sa lado nin sektor nin paraoma nganing pacil na an pag-viaje kan saindang produkto agrikultura sa mercado publico kan ciudad.


Nagkaperang mga banwaan an aagihan kan perrokaril hali sa Albay asin Camarines Sur asin sa ultimong PNR Station sa ciudad digdi na ibaba sa Naga an produkto.


Bako lang sa sektor nin paraoma, sa saradit na negosasyo sa mercado publico maging sa konsumedores na puedeng magbarato an presyo asin an dakulang bagay tabang pa sa lado nin economia, sabi pa ni Consejal Castillo.


An viaje kan PNR haling Camarines Sur sundo sa Albay nagpoon kan Hulyo 31, 2023 dakulang opurtunidad sa lado nin economia asin si mga pasajeros na haling hararayong barangay mantang barato pa an flete.


An flete cantidad sanang P15.00 cada hahalian na estasyon asin kun haling Naga sundo sa Ligao cantidad P105.00.


Nakatalaan bukasan an ika-sampolong PNR Station sa Nabua, Camarines Sur asin kabali sa mga inaagihan na estasyon iyo an Pili, Baao, Iriga, Bato sa Camarines Sur asin sa mga banwaan kan Matacon, Polangui, Oas, asin Ligao sa Albay.


Dinagdag pa kan consejal na sa maabot na Peñafrancia fiesta pacil na sa ribo-ribong devotos ni Ina an viaje hali sa Albay pasiring sa Ciudad.


Sa ngunian apat an kotse kan commuter train na igwang capacidad na 1,300 pasajeros, segun sa manijamiento kan PNR Bicol. (dpa)

Comments


bottom of page