PAGBUHAY KAN PNR BICOL EXPRESS: Mga congresista sa Bicol dapat magkasararo

Posibleng marealisar an pangiturogan kan mga Bicolano buhayon giraray an Philippine National Railways (PNR) Bicol Express Line kan Naga – Manila kun magkakasararo an mga Bicolanong congresista na hagadon ki Presidente Ferdinand Marcos Jr. nganing pabulosan nin fondo para sa rehabilitasyon kan linya haling Calamba pasiring sa Sorsogon.

Ini an pagtubod ni PNR Naga Station Operations Division Area 2 OIC, Joel Dajac kan makaulay kan Bicol Mail sa tahaw kan saindang mga pag-andam kan dagdagan an mga viaje sa ruta kan commuter train Naga-Sipocot asin Naga Legazpi.

Kan administrasyon ni dating Presidente Rodrigo Duterte pinangako mangyayari na an PNR South Long Haul Project (Manila-Sorsogon) na nakatalaan mag-utang nin bilyones pesos sa nasyon kan China alagad nagpalyar kan magtukaw an bagong administrasyon.

Nagkaperang mga lehislador sa Bicol an naghuhurot sa administrasyon ni Marcos na dapat buhayon na an PNR Bicol Express.

Kan Septiembre 2023 sa ginibong pag-interpellate ni Camarines Sur 3rd district Representant Gabriel Bordado Jr. sa deliberasyon kan General Appropriation Bill sa propuestong 2024 national budget, saiyang hinapot an padreno kan Php5.768 trillion budget, kabali sa hinapot an status kan rehabilitasyon sa PNR alagad an kasimbagan dai kabali sa propuestong 2024 national budget mantang an Chinese financing institution an nagsibog sa pagpa-utang.

Haloy nang pigtutulod ni Bordado na ipadagos an proyekto mantang dakulang tabang sa pagprogreso kan rehiyon.

Sinabi pa na dapat tawan prayoridad ni Marcos an pagbuhay kan viaje kan perrokaril huli kan importancia kaini para sa pag-uswag kan economia asin pag-asenso kan rehiyon.

Perang presidente an nagpangako sa rehabilitasyon kan PNR sagcod sana sa pangako.

Afuera sa representante kan tercer distrito kan Camarines Sur si Rep LRay Villafuerte asin Ako Bicol Party List naghuhurot na ki Marcos na iimplementar na an rehablistasyon kan perrokaril nganing makatabang sa progreso sa Kabikolan.

Kun marealisar piglalaoman dakul na an mapasiring sa rehiyon na mga turista asin barato pa an flete.