Pagbukas sa turista kan Gota beach, binawi

Caramoan, Camarines Sur --- Kinancelar kan Capitolyo Provincial sa Camarines Sur an pigtalaan na pagbukas sa publiko asin turista kan Gota Beach Resort sa banwaan na ini na pigtalaan sa premirong semana kan Abril mantang padagos naman naglalangkaw an coronavirus disease (Covid-19).


Bulan pa nin Noviembre 2021 pighaman na kan gobierno provincial an plano sa pagbukas liwat sa turista sa irarum kan ‘‘new normal’’ alagad nakaka-alarma naman an paglangkaw kan Covid-19 lalo na sa Metro Manila asin sa iba pang mga lugar.


Si Vocal Angel Naval kan segundo distrito kan Camarines Sur nagkumfirmar kan desisyon kan provincia sa pamamayo ni Gobernador Migz Villafuerte na igilid muna an pagbukas sa operasyon kan bantugan na beach resort sa Partido area nganing makaibitar an tawo sa posibleng local transmission kan virus.


Pigplano an pagbuelta sa operasyon kan resort sa pagtubod na makulpa na an coronavirus disease ngunian na taon alagad marikas na nagpaparalangkaw an caso.


Ini dawa na ngani hababaon an caso sa Camarines Sur asin sa bilog na rona kan Bicol alagad an pighahaditan an paglaog kan turista hale sa ibang ciudad na posibleng may bitbit nin virus.


Sa pinakahuring report kan Department of Health (DOH), inaabot na nin labi sa cinco mil an caso sa Covid-19 sa Metro Manila apesar na padagos na an ginigibong vaccination program na pigtatawan muna nin prioridad iyo an mga health workers.


Ini kabaliktaran na hababa na an caso huli ta igwa nang suplay sa nasyon kan bakuna contra sa virus.


Dai paman sinabi kun nuarin idadagos an pagbukas kan beach resort na dating dinadayo nin mga turista.


An industriya sa turismo padagos na apektado huli kan nagdadamay na pandemya. (DPA)