Pagconstruir kan Partido Boulevard 40 porciento nang nahaman
Ni Sonny Malate
TIGAON, Camarines Sur --- Haros nasa 40 porciento na kan total na distanciang 14 kilometros an natapos na sa construction kan Junction Nato - Sabang Coastal Road Project sa paagi kan Camarines Sur 4th Engineering District na pinapamayohan ni District Engineer Gemma B. Timbang.
An coastal road nagpoon sa Nato, Sagñay, asin pasiring sa Sabang, banwaan nin San Jose, Camarines Sur.
Segun ki Engr. Sanny A. Cañeso, Public Information Officer, an tinampo na mas bistado sa pangaran na Partido Boulevard pigpoonan iconstruir kan 2018 asin posibleng matapos sa 2026 kun an fundo para didgi padagos na maipabulos.
Burabod kan fundo kan patinampo iyo an Multi - Year Program and Scheduling kan gobyerno nacional. Total na alokasyon para digdi hasta sa macompleto na ini maabot sa labing Dos Billones (P2B) Pesos.
Talisay-Dolo San Jose portion kan Partido Boulevard. (Raymart Borlon, LGU San Jose)
An tinampo iguang seawall, sidewalk, drainage, wave deflector, solar lighting, concrete side benches asin concrete plant boxes. Ini linalaoman na mabusol kan turismo, kabuhayan asin pangangaipo nin mobility sa mga barangay sa gilid kan Lagonoy Gulf sa Saģñay, Tigaon, San Jose asin Lagonoy.
Sa presente, kadakol nang mga turista an nagbibisita digdi. Siring man, ini kinakawilihan bilang bagong biking, jogging asin walking area sa Partido Area. An kahalabaan kan boulevard sarong magayon na lugar kun banggi huli sa solar lights asin preskong duros gikan sa dagat.
Sa nagkakapirang portion sa barangay Tagas asin Calahan sa San Jose nagburutwaan an mga food stall asin recreation bar asin iba pang micro-economic enterprises.
Sinabi ni Cañeso na kan mga nagtalikod na bulan, naggibo sinda nin mga public consultation sa mga barangay na apektado kan pagpatinampo an mga pribadong pagrurugaring. Sa tamang paliwanag kan mga beneficio na dadarahon kan pagkakaiguang coastal road, an mga residentes nagtao kan saindang cooperacion tanganing mahimo an proyekto.
Sa ngonian pig-aasikaso na kan DPWH Camarines Sur 4th Engineering District na nakabase sa banwaan na ini an annotation sa titulo kan mga lote na inagihan kan patinampo sa pakikipagtabangan kan mga kagsadiri kaini.
Dagdag pa man kan enhinyero, kun matapos na an tinampo sa may parteng barangay Sabang, San Jose, sarong feasibility study an gigibohon para sa construction kan tulay na makonektar kan barangay na ini sa ibong na barangay, an San Sebastian na sakop kan Lagonoy. An road link na ini matao man nin access sa national road pasiring sa Caramoan, Camarines Sur.
Mientrastanto, kan mga tuminalikod na semana, pigbuyagyag ni Cong. Arnie Fuentebella sa intrevista kan Bicol Mail na an pagconstruir kan Partido Boulevard macomplemento sa proposed Partido International Airport project na ibubugtak sa Barangay Pugay, San Jose, Camarines Sur.
An sinabing proponedong proyekto dati nang pigbusol kan mga tuminalikod na taon, alagad ini iginilid muna sa tahaw kan mga mainit na issue na nagbutwa katakod digdi.
Sa esfuerzos ni Fuentebella, ini pigmama-igotan na mahanapan nin bastanteng fundo tanganing magkatotoo na sa urog na madaling panahon.
Kun mahaman na an Partido International Airport, pigtutubodan na ini magigin dakulang contribuente sa paggantad kan pangangaipo sa marikas na transportation, pagparambong kan turismo asin economia sa kabilogan kan ronang Kabikolan asin mga pagtaraid na lugar.