Pagcrear nin LTO DO madali nang maaprubar sa senado

Nagtutubod an pamayo kan LTO office sa Pili, Camarines Sur na makakalusot sa senado an House Bill 6712 na minacrear bilang regular na LTO District Office sa kabesira kan Camarines Sur mantang makakahawas na sa Committee on Transportation si Senador Grace Poe bilang chairman.

Sinabi ni Eric Torrecampo, jefe kan LTO office nagpahayag kan makuanan nin entrevista kan Bicol Mail na dai palang nahahaloy nag-atender na sinda sa committee hearing asin isusunod na sa plenaryo.

Padreno kan HB 6712 si Representante Gabriel H. Bordado Jr. kan tercer distrito kan Camarines Sur asin an bill nakalusot sa Camara-Baja kan Febrero 2024.

Kun maaprobar isasakat sa Malacañang nganing aprubaran ni Presidente Ferdinand R. Marcos Jr. asin dagos nang magiging ley.

An HB 6712 ‘‘An act creating a regular LTO District Office in the municipality of Pili, Camarines Sur to be known as the LTO Licensing Center of Pili, Camarines Sur appropriating funds therefor and for other purposes’’.

An LTO Pili, extension office kan LTO District Office sa Ciudad nin Naga nakabawas sa nagpaparahibog na may transaksyon sa ciudad asin kun maaprobaran dakulang tabang nganing dai na magpasiring sa Naga.

Nagpahayag si Torrecampo asin an LTO regional office sa pamamayo ni Francisco Rances, Jr. nin pasasalamat huli ta madaling naaprubaran sa Camara-Baja asin yaon na sa committee level kan senado sagcod magbabawas na an halabang pagpili sa Ciudad nin Naga huli ta igua na sa Kabesira kan provincia, igua na sa Pamplona, Ragay, Ciudad nin Iriga asin sa dai mahahaloy posibleng makalusot sa senado na magkaigua nin LTO District Office sa municipalidad kan Nabua, sakop kan Rinconada area.

An bill ni Bordado dakulang bagay sa mga taga Pili asin pagtaraid na municipalidad nganing dai na magpirila sa mahibog na kliyente sa LTO Naga.