Pagcrear sa lone congressional district kan Naga yaon na sa lamesa ni Bordado

Yaon na sa lamesa ni Representante Gabriel H. Bordado Jr. kan tercer distrito kan Camarines Sur an pagaadal na macrear kan Ciudad nin Naga nganing gibohon ‘‘lone congressional district’’.

Kasunod kan rekomendasyon kan ibang sektor asin an sarong resolusyon sa Sangguniang Panlungsod na naghuhurot ki Bordado na magsangat nin house bill sa Camara-Baja nganing maging sulong congressional district an ciudad.

Igwa nang pinasar na resolusyon sa SP padreno si Consejal Lito Del Rosario alagad dai paman narerecibe kan opisina kan representante kan tercer district kan Camarines Sur.

Ini an mga pahayag sa entrevista kan Bicol Mail ki dating alcalde Abang Mabolo asin Chief of Staff kan congresista alagad magdedepende sa ley sa pagcrear nin sarong congressional district.

Alagad saiya pang sinabi na saro sa saindang naheling base sa Article VI kan 1987 Constitution dapat an sarong ciudad o provincia igwang 250,000 na populasyon nganing maging sarong distrito para sa sarong representante.

An problema kun babasehan an 2020 Census kan Philippine Statistic Authority (PSA) an Ciudad nin Naga igwa pa sanang 209,170 na populasyon.

Kun babalikan man si nangyari si pagbanga kan dating 1st congressional district sa Camarines Sur ginibong duwang distrito na naging cuestionable man si populasyon kaidto apesar na kulang ngani sa 200 mil si populasyon alagad nakalusot sa congreso. Maging sa iba pang mga lugar nangyari an kulang sa populasyon alagad nakakalusot.

Si nangyari sa dating 1st congressional district sa tahaw kan ambisyon ni Dato Arroyo, presidential son ni Presidente Gloria Macapagal-Arroyo.

Nakalusot an house bill sa pagbanga sa duwang distrito mantang poderoso sa congreso kaidto an administrasyon ni Arroyo.

Ini ngunian an pig-aadalan ni Bordado, sabi pa kan Chief of Staff kan congresista. (dpa)