PAGDESISYON NI LENI SA NAT’L ELECTION: Comelec dinadagsa nin mapa-rehistro

An Commission on Election (Comelec) sa Ciudad nin Naga igwa sanang 112 mil na target registered voters alagad mas naglubo asin aaboton pa ini sa 117 mil sundo sa ultimo dia sa pagpalista nin votantes sa Oktubre 30.

An dahilan nagkaigwa nin motivacion nin huli ta igwang napapalaban na Bicolana na candidatong presidente, bise presidente Leni Robredo.

Maging sa iba pang mga banwaan sa Camarines Sur marikas na naglubo an mga nagpalista asin nadagdagan kan palawigon an voters registration hasta sa Oktubre 30.

Ini an pagtubod ni Abogado Maico Julia Jr. Election Officer sa Ciudad nin Naga asin opisyal na parataram kan Comelec Camarines Sur sagcod na nagbalyo sinda nin mall nganing mahiwas an lugar kan mga nagpapalista sa saindang opisina nganing seguradohon makaparticipar sa maabot na presidential election sa Mayo 9, 2021.

Si VP Robredo nagkumfirmar sana kan saiyang pagdalagan komo candidato presidente kan Oktubre 7 asin pagbuelta ninda sa voters registration kan Oktubre 11 haros biglang nagparalaba an mga nagpipirila mala ngani alas 6:00 nin aga igwa nang nagpipila para makaseguro maka-rehistro.

Igwa nang nag-eedad na 30 hasta 40 anyos ngunian sana nagpapalista sa Comelec maging an pagdakul kan mga naghaharabol na jovenes.

Sinabi pa ni Julia inaabot na nin 250 aroaldaw an nagpapa-rehistro asin makukua ninda an bagong 117 mil na target hasta sa Oktubre 30.

Cada aldaw nin Lunes, Martes asin Miercules sa saindang opisina ginigibo an voters registration mantang sa Juevez asin Viernes nabalyo sinda sa Mall.

Sa maabot na eleksyon, sinabi pa kan opisyal kan Comelec hinahalat pa ninda an desisyon kan mga commissioner kun mabugtak nin suhay na voting precinct sa mga senior citizens asin PWDs mantang dai pang kasegurohan kun imamantenir an 1,000 votante cada precinct. (dpa)