PAGGABOT KAN MGA POSTE KAN CASURECO II Kable kan internet, Cable TV, telepono dai hinaharale

Ano man na oras andam garaboton kan Camarines Sur II Electric Cooperative (Casureco II) an mga lomang poste sa kalabaan kan Villanueva Avenue (dating Kalye Liboton), Ciudad nin Naga alagad an nakakaulang iyo an dai hinaharaling mga linya nin kable kan internet, telepono asin Cable TV.

Haloy nang napatindog an bagong mga poste mala ngani andam na nindang pabulosan nin suplay nin kuryente an pighahalat nalang iyo an pagharale kan mga kable sa lomang mga poste.

Ini an mga pahayag ni Rinner Bucay, opisyal na parataram kan Casureco II kasunod kan paglangkag na kan Department of Public Works and Highways (DPWH), 3rd Engineering District kan Camarines Sur na dai matapos-tapos an saindang road widening project sa Villanueva Avenue huli kan mga ulang na poste asin nagkapera na sanang pribadong residencia.

Pigbuyagyag ni Bucay na nagkapera nang veces sinda nagpadara nin noticia sa Cable TV company, internet asin telepono alagad garong ‘‘baliwala sana an saindang noticia’’, inabot na nin bagong taon abala an aksyon.

Saiya pang sinabi na maheheling mismo sa gilid kan Villanueva Ave. an mga napatindog na konkreto asin bagong poste halat nalang an energization kaini oras na magkagarabot na an lomang mga poste.

Si Assistant District Engr. Richard Ragragio kan Camarines Sur 3rd Engineering District kan DPWH nagsabi na kun nagcooperar tolos an nagkaperang kagharong asin nahale na an mga poste kan Casureco II, tapos na an pagpahiwas kan tinampo.

Pigbuyagyag pa ni Ragragio na anom nang kagrugaring nin lote asin residencia sa apektadong lugar kan proyekto an sainda nang kinasohan nin expropriation sa jusgado.

Haloy na sindang nakikiulay sagcod na nagdesisyon an saindang opisina na darahon na an caso sa corte, sabi pa. (DPAureus)