PAGGAMIT NIN GENERATOR: Makakaina sa pagnipis kan suplay nin kuryente, sabi
An Camarines Sur II Electric Cooperative (Casureco) Inc. nag-apelar sa mga industrial saka establisimiento de negosyo maggamit ngona kan saindang generator sa panahon kan peak hours envez kan kuryente hale sa electric cooperative (EC) tanganing mabawasan an pagnipis kan suplay nin kuryente asin maibitaran an mga brownout.
Si Rinner Bucay opisyal na parataram kan Casureco II nagpahayag kaini sa Bicol Mail kasunod kan kahagadan kan Department of Energy (DOE) sa paagi kan Interruptible Load Program (ILP) nganing makabawas sa ‘overall demand’ kan grid.
An DOE, sa paagi kan Electric Power Industry Management Bureau (EPIMB) regular an saindang coordinasyon sa National Grid Corporation of the Philippines (NGCP) asin sa mga generation companies nganing maaraman an kamugtakan kan suplay nin kuryente na ano man na oras nadeclarang Red asin Yellow alerts sa Luzon maging sa Visayas.
Hinagad kan Casureco II sa miembros-consumedores na magtipid ngona sa paggamit kuryente lalo na kun dai man kaipuhan.
An grabeng init nakaapektar sa operasyon kan mga planta na nagiging causa sa pagnipis kan suplay nin kuryente.
Piglinaw pa ni Bucay huli kan grabeng init kan panahon an NGCP ano man na oras iyo an napadara sa mga ECs kan aldaw asin oras kan Red asin Yellow alerts mantang mayo sa saindang kontrol.
Alagad sagcod na grabe an init nin panahon asin pag-shut down nin mga planta dai malilikayan an pag-declara nin Red asin Yellow alerts.
An dahilan kan Red alert huli ta nauubos na an reserba nin kuryente mantang an Yellow alert igua pang reserba alagad bakong normal.