Paghale kan red tagging gibohon bako sa taram

An Bagong Alyansang Makabayan (BAYAN) sa Bicol naglalaom sa tinaram kan bagong matukaw na National Security Adviser (NSA) Professor Clarita Carlos na hahalion niya an red tagging na nagdanay sa paluwason na administrasyon Presidente Rodrigo Duterte.


Si James Casilihan, lider kan BAYAN nagpahayag na dapat gibohon ni Carlos an saiyang enot na pangako dawa dai pa natukaw sa posisyon asin naglalaom sinda na bako sanang sa taram.


Nagkapera nang mga lider kan militanteng grupo na pig-red tag kan awtoridad alagad biglang nawawara mantang an iba ginigibohan kun ano-anong caso kriminal.


An progresibong grupo nanindugan na dapat tunawon na an End of Local Communist Armed Conflict (ELCAC) na bilyones pesos an ginagastos kan gobierno envez na itabang sa mga tios na namamanuan Filipino.


Alagad si Carlos nagpahayag sa media na saiyang ipapadagos an programa kan ELCAC sa masunod na administrasyon sa pagtubod na makakatabang sa mga programa sa barangay.


Siya iyo na an masunod na NSA sa incoming President Marcos nag-ako na kan posisyon sa dating pig-oopresir sa saiya na maging sekretaryo kan Department of Foreign Affairs.


Si Carlos dating political science professor kan University of the Philippines asin kan National Defense College of the Philippines.


Sinabi pa kan grupo na saindang tinutuyaw an PNP asin Philippine Army sa Ciudad nin Naga na nagcrecrear nin isyu sa matuninong na lugar kan Ciudad nin Naga sa mga pahayag sa Sangguniang Panlungsod na an Naga iyo an white area kan CPP/NPA.


An boot sabihon ninda an white area iyo an lugar na yaon digdi an mga lider kan CPP/NPA, mga nagtataong ‘‘resources’’ logistical support alagad mayong nangyayaring ralaban kan rebeldeng NPA PNP maging militar.


Saiya pang piglinaw dai nangagahulogan an pagiging acitivista kumunista o terorista na. ‘‘Mas marhay ngani ta may nagtutuyaw sa salang gibo kan gobierno. (dpa)