PAGHANDA SA MAKUSOG NA LINOG: CEO nag iinspeksyon sa mga lomang edificio
Padagos an mga ginigibong inspeksyon kan City Engineer’s Office (CEO) sa mga pribadong edificio/establisimiento de negosyo sa Ciudad nin Naga asin segurohon ipaheling an saindang propriedad sa civil engineers o structural engineers nganing maaraman an kapusogon bilang paghanda sa posibleng makusog na linog.
Si City Engineer Alexander Caning nagpahayag sa Bicol Mail na an saindang personajes sa paagi kan Building Section sa pamamayo ni Engr. Elmer Albo sa saindang pag-inspeksyon igwa nang nadiscobreng pribadong edificio na nag-gagatak na an ibang porsyon kan edificio.
An saindang lakdang sa tahaw kan warak-warak na mga insidente nin paglinog sa Bicol magin sa iba pang provincia kan nasyon.
Pinadarahan na nin noticia an kagsadiri kan propriedad na maninigo nang magkua nin civil engineers o structural engineers bilang patanid nganing makalikay sa ano man na dakulang danyos.
Sa irarum kan National Building Code Development Office Memo Circular No. 03, Series 2011, an building officials mandato na magkondukta nin taonan na inspeksyon sa gabos na klase nin edificio sa laog kan saindang jurisdiksyon.
Sinabi pa kan CEO an edificio na sakop kan direktiva kinababalihan nin duwang escalon asin pataas, na nag-eedad na nin diez anyos pataas, sa one-storey structures na igwang 1,000 cubic meters, na nageedad na nin diez anyos pataas.
Kabali sa inspeksyon iyo an mga simbahan asin iba pang edificio maging an Naga City People’s Mall. Labi sa cincuentang presenting edificio an dapat liboton kan CEO
An pahayag kan city engineer kasunod man kan sinabi ni Elmer Elcamel, jefe kan City Disaster Risk Reduction and Management Office na posibleng aboton sa cinco mil na mga tawo an mairedo oras na magtama sa ciudad an Magnitude 6.0 na linog. An patanid na ini ni Elcamel ginibo sa atubangan kan miembros kan media sa nakaaging Disaster Risk Reduction Management Training for Media Practitioners.
An peligro digdi segun sa CDRRMO kun magtama an makusog na linog sa mga oras nin alas 10:00 nin aga hasta alas 7:00 nin banggi.
An dakulang numero kan posibleng maging biktima pigbasehan ni Elcamel na huli kan durokoton nang lomang edificio o mga establisimiento de negosyo, mga nagbabakal asin iba pang transaksyon sa ciudad.
An CDRRMO kabale sa nag-iinspeksyon sa mga establisimiento nganing maghimo nin mga plano ano man na posibleng mangyari.
Alagad naglinaw na bako man sa pag-alarma envez maibitaran na igwa pang mabiktima sa calamidad. (dpa)