top of page

Paghuros kan presyo nin paroy agrangay kan paraoma

Piglalaoman na mababa an presyo kan bagas sa mercado huli kan panahon pa nin aranihan nin paroy mala ngani si dating presyong P25 cada kilo alagad naghuros sa P21.


Agrangay an sektor nin paraoma kun kasuarin piglalaoman na makakabawi sinda sa gastos sa pag-oma alagad bagsak an presyo na posibleng maghuros naman sa dating nagbabang P21.


An Kilusang Magbubukid ng Bicol padagos na nagdedenuncia sa epekto sainda kan Rice Tariffication Law na inaprubaran ni dating Presidente Rodrigo Duterte kan 2019. Napaboran digdi si mga higanteng negosyanteng bagas bako an sektor paraoma, sabi pa.


Pig-eenganyar kan National Food Authority (NFA) an paraoma na ipatungod sainda an paroy na babakalon kan ahencia P23 cada kilo.


Dawa igwang mga apektadong kaomahan huli sa epekto kan paltik alagad sinabi ni Lovella Guarin, regional spokesperson kan Department of Agriculture na kinakarkulong 600,000 toneladang metrico paroy an magigin produksyon ngunian na aranihan poon kan Marso hasta Mayo 2024.


Kun icoconverter sa bagas igwang dugang na suplay sa rehiyon nin 400,000 metrico tonelada.


Kan Deciembre 2023, naikurit kan DA Bicol na may 66,000 hektarya kaomahan an amay nagtanuman paroy. An ahencia nakadistribuer sa mga paraoma nin libreng banhi, planting materials, saka fertilizers discount vouchers antes naglaog an panahon nin paltik o El Niño.


Si mga paraoma na rehistrado sa Registry System for Basic Sector in Agriculture (RSBA) iyo an natawan ayuda kan DA Bicol.


Nagkaigwa nin panahon an paraoma na makataruk nin paroy kan Deciembre 2023 huli kan padagos na pagbulos nin uran.


An DA bulan pa nin Hunyo 2024 nagpaluwas nin mahiwas na impormasyon sa publico asin paroma sa magigin epekto kan paltik. Huli kaini, amay nagtanum paroy an paraoma sa Bicol.

תגובות


bottom of page