PAGIRUMDUM KAN COMELEC: Political dynasty bawal sa SK

An Commission on Election (Comelec) liwat nagpapatanid sa mga asperanteng candidato sa eleksyon sa Sangguniang Kabataan (SK) sa Oktubre 30, 2023 na mayo pang pagbabago kan SK Reform Law sa Anti - Political Dynasty Provision.

Si Atty. Maico Julia Jr. Election Officer sa Ciudad nin Naga asin opisyal na parataram kan Comelec Camarines Sur nagpahayag sa entrevista kan Bicol Mail na sagcod sa ngunian nagdadanay pa an sinambit na probisyon asin mayong ginibong enmienda an congreso sa SK Reform Law.

Pigbiklad kan opisyal kan Comelec an ley na nagsasabi an arin man na posisyon na macandidato dapat dai napipinsanan poon sa ‘’2nd degree of consanguinity or affinity to any incumbent elected barangay, city/municipal, provincial or national official.’’ Nagtutubod si Julia na dapat aram na kan mga asperante sa SK election nganing maseguro na calificado sinda sa pirilian.

Sa Probisyon kan Dinastiya Consanguinity Affinity

Tugang, Lolo o Lola mo 1. Tugang, Lolo o Lola kan agom mo

Nanay o Tatay mo 2. Nanay o Tatay kan agom mo

3. Agom mo, Madrasta o Madrasto mo 4. Madrasta o Madrasto kan agom mo

An ibang mga jovenes disganado sa ley mientras na nakakalibre an ibang mga elehidong opisyales lokal asin nasyonal apesar na dapat hagop sinda kan anti political dynasty provision.

Si masinutil sa ley dapat igwang magsangat nin protest sa Comelec nganing maaraman kun discalificado an sarong SK candidate.

Sa enot na semana kan Hulyo 3-7, 2023 iyo an pagplantiar nin mga certifico de candidatura sa pigtalaan na sarabay na SK asin Barangay elections sa Oktubre 30. Sa Oktubre 19-28, 2023 iyo an halipot na aldaw kan campaign period asin sa Nobiembre 29 ultimong aldaw sa pagplantiar nin SOCE. (dpa)