Pagkakabadil gadan ki Ebonite sa jepatura dapat inbestigaran
An Bikolana Gabriela naghuhurot sa PNP Provincial Office maging sa PNP Regional Command sa Bicol na pararumon pa an inbestigasyon kun panong nabadil sa laog kan Municipal Police Station sa Nabua, Camarines Sur an suspechado sa posibleng panlulupig asin pag-gadan sa 12 anyos na daragita na residente kan Brgy San Antonio Ogbon, na nakua nang nagrurugnas an bangkay sa Brgy. Bustrac, Nabua, CamSur.
Si Jen Nagrampa, pamayo kan Bikolana Gabriela nagpahayag na suportado ninda an pangapudan kan familia kan biktimang si Trecia May Samson na naghahagad nin justicia sa pagkaka-gadan sa biktima na nawara puon kan Agosto 4 alagad nakua nasa laog kan sako kan Agosto 10 sa Brgy. Bursac sa may linderos kan Brgy. San Vicente kan kaparejong banwaan.
An suspechado si Ricky Ebonite na nagsuko sa MPS Nabua mga ala 1:20 nin maagahon kan Agosto 10 hale sa custodia kan sarong jail guard kan BJMP.
Si Police Major Divino Pelea, jefe de pulisya nagsabi sa tahaw kan saindang ginigibong inbestigasyon biglang inagaw an saiyang service 99mm kan suspetchado asin napiritan na badilon kan kaibanan na pulis kan pamayo kan MPS Nabua.
Sinabi ni Nagrampa, saindang na-iintindihan na nasa peligro man an buhay kan miembro kan pulis sa jefatura alagad nganing patas an inbestigasyon iluwas an CCTV Camera sa publiko nganing mahale an mga pagduda.
Kinukundenar kan Bikolana Gabriela an makangerat na krimen alagad mas bentaje matawan nin tunay na justicia an biktimang doce anyos.
Si Alcalde Madel Alfelor kan Ciudad nin Iriga nagtaya nin P100,000 na reward money sa makakatukdo sa responsable sa krimen alagad nabigla siya sa report kan PNP na binadil an suspechado huli kan pag-agaw nin armas.
Sinabi ni Alfelor katuyohan kan saiyang reward nganing matawan justicia an makangerat na paggagadan sa biktima.
Maging an familia kan biktima nagrereclamo pa’nong ginadan pa an suspechado dai na lugod makakataram kun igwa pang ibang kasabuat sa krimen.
Si Police Lt. Louie dela Peña, opisyal na parataram kan PNP Provincial Office kan Camarines Sur nag-asegurar na saindang iinbestigaran an pagkaka-badil gadan kan suspechado sa laog kan jepatura.
Si Brgy. Kagawad Nestor Lavilla kan Brgy. San Antonio Ogbon, puon na maghagad nin tabang sa saiya an Lolahon kan biktima kan Agosto 5 iyo an responsable kun pa’nong nahanap an nagrurugnas na bangkay sa paagi kan pagsusog sa mga kabisto ni Trecia May. (dpa)