Pagklase sa modular learning desbentaje sa estudiantes

An Department of Education (DepEd) nagpahayag na dapat maibalik na an normal na klase sa mga classroom o sa paagi kan face-to-face classes (F2F) alagad mantang an problema kan ibang mga magurang kulang sa pagka-aram nganing matabangan an saindang estudiantes sa modular learning.


Ini an nagkapera sanang problema kan mga paratukdo nganing mapaangat an edukasyon dawa panahon nin pandemya mantang sa face-to-face classes pabor sa paratukdo ta igwang ‘‘interaction’’ naipapaliwanag an mga ideya sa mga estudiantes asin naheheling an saindang kakayahan sa pag-adal.


Si Dr. Sueño Luzada, assistant division superintendent kan DepEd Camarines Sur nagpahayag sa tahaw kan dai pang kasegurohan kun nuarin ibabalik an in-person classes huli ta sa ngunian consideradong apektado an pag-adal kan mga estudiantes huli kan pandemya.


Nagkapera nang mga escuelahan sa mga escuelas publica sa Camarines Sur an enot nang nagpuon kan saindang limited face-to-face classes alagad kinancelar huli kan bigla naman na paglangkaw kan coronavirus disease kan bulan nin Enero 2022.


Dawa nag-aatubang sa krisis sa virus, an DepEd maandam man giraray kan expanded face-to-face classes nganing preparado kun mawara na an problema sa nasyon.


Sainda man giraray na iimplementar an health protocols kan national IATF asin kabale na digdi an pagpadagos na mabakunahan an mga paratukdo na dai pang bakuna nin vaccine laban sa virus.


Sa ngunian an Camarines Sur nasa alert level 3 sa Covid-19 mantang iyo an perming may halangkaw na caso sa virus base sa mga pinapaluwas na datus kan Departamento de Salud sa Bicol. (dpa)