Pagkudal sa mga propriedad kan mga negosyante, ilegal

An City Engineer’s Office kan lokal na gobierno kan Ciudad nin Naga nagpahayag na ilegal an ginibong pagkudal kan nagpapamidbid na taohan ni Henry Rodriguez, iredero ni Don Hermoneges Rodriguez sa propriedad ninda Engr. Ben Shea, Robert Obiedo asin iba pang apektadong negosyante sa barangay Triangulo.

Pagbalga sa Building Code an saindang aatubangon, alagad si Engr. Elmer Albo, Building Official kan ciudad nag-isyu na nin notice of violation sa responsableng taohan kan iredero ni Rodriguez.

Ini an mga pahayag ni City Engr. Alexander Caning kan makaulay kan Bicol Mail sa tahaw kan controvercia sa kurudalan sa mga propriedad nin mga negosyante kan nagpapabistong ‘‘claimant’’.

Kaipuhan magkua sinda nin fencing permit sa City Engineer’s Office alagad kaipuhan magproceso muna kan mga minasunod na rekisitos; 1. Mag-file up muna sa application form, 2. fencing plan with site development and vicinity map, 3. Bill of materials/cost estimates, 4. Specification, 5. Lot plan with certification of a geodetic engineer, 6. Transfer certificate of title, 7. Deed of sale/lease contract, 8. Updated real property tax declaration, 9. Current real property tax receipt, 10. Zoning/location clearance, 11. Fire clearance, 12. Health/safety program, asin 13. ENRO Clearance.

Napag-araman na kan Noviembre 15, 2021 nagpadara nin surat sa City Hall naka-address ki Alcalde Nelson Legacion, City Director Marlon Catan kan NCPO, Brgy. Captain Allan Beriso kan Triangulo, asin Engr. Caning an surat hale ki Abogado Reynaldo Herrera, Legal Counsel kan iredero si Henry Rodriguez na nag-iinformar na malaog sinda sa 72 hektarya daga sa brgy. Triangulo, Ciudad nin Naga nganing magbugtak nin ‘‘barb wire fence’’.

Sinabi pa sa surat na an saindang paglaog base sa desisyon kan Regional Trial Court Branch 34 petsado Febrero 28, 2000 na nag-aawtorisar sa Attorney-In-Fact na maglaog sa sinambit na propriedad.

Alagad piglinaw ni Caning na an sinambit na surat nagpapa-aram sana alagad kaipuhan sunodon ninda an proceso sa fencing permit.

Dai man makuanan nin pahayag an lado ni Rodriguez mantang mayo man sa Ciudad nin Naga maging sa lugar kan kinudalan na propriedad dai man mahanap an pigsasabing taohan kan iredero envez mga naka-duty sanang security guard. (dpa)