PAGLANGKAW SA PRESYO KAN PAROY: Bagas sa mercado nagmahal

An mahal na presyo kan bagas sa mga mercado bonga kan halangkaw man na presyo kan paroy sa mga kumprada na nagcacantidad nang P24 hasta P27 dinaog sa kumpetensya an NFA buying price na P23.

Ini an naheheling na epekto sa reclamo kan consumedores sa paglangkaw kan presyo kan bagas na nag-aabot na sa P55 hasta P63, sabi ni Luvella Guarin an opisyal na parataram kan Department of Agriculture (DA) sa Bicol.

Halangkaw si produksyon nin paroy sa Bicol sa rehiyon kan nakaaging aranihan sagcod sa ngunian.

Magin sa mga pahayag kan rice retailers an saindang reclamo halangkaw an presyo kan saindang pinapabakal na bagas huli ta naglangkaw man an presyo na saindang inaangkat sa rice traders.

An DA base sa Price Act an guidelines, solamente an sekretaryo kan ahencia puedeng magdeclara nin suggested retail price (SRP) alagad kaipuhan pa an seryeng consultasyon sa publico maging an opisina rehiyonal kan DA mayong price control mantang an saindang trabajo sagcod sana sa pag-monitor kan presyo.

An National Food Authority kun dati nakaka-kumpetensya sa presyo kan bagas alagad prohibido na sinda magsuplay sa mga mercado mantang dai na tinutugot base sa Rice Tariffication Law. An sainda sanang trabajo mag-stock nin suplay nganing igwang food security encaso maglamasa nin calamidad segun sa ley.

Kan Noviembre 2023, sinabi ni assistant regional manager kan NFA Bicol padagos nagdadagsa an paroy sa saindang bodega hali sa mga paraoma huli ta an presyo sa saindang palay procurement program cantidad P23 igwa pang insentibong P3 an Capitolio Provincial kan Albay asin Camarines Norte na igwa nang total na P26 cada kilo alagad posibleng maapektaran mantang igwa nang mga kumprada na nagbabakal nin P27 cada kilo.

Mientras tanto an Kilusang Magbubukid sa Bicol nagtutuyaw man sa RTL kan gobierno mientras an nakikinabang sa ngunian iyo an mga higanteng negosyanteng bagas bakong paraoma.

Saindang hagad na tunawon kan gobierno an RTL mantang an nakikinabang sana kan sinambit na ley iyo an mga rice traders.

Pangakong P20 na presyo kan bagas nagtriple mas lalong nagmahal sa P63.