Paglikay sa kalayo sinabat nin kasulo

Sinabat nin kasulo sa barangay Triangulo, Ciudad nin Naga an enot na aldaw kan Fire Prevention Month kan Bureau of Fire Protection (BFP), mga treinta minutos naabante pa sana an actividad sa motorcade kan mga firetruck kan BFP, Naga White Brigade asin Ching Po Tong sagcod na temporaryong kinancelar an programa.

Duwang establisimiento de negosyo asin sarong apartment type na residencia an nasulo dawa na ngani nakaresponde tolos an mga bombero.

Nakatuwang kan BFP kan Naga iyo an Naga White Brigade asin Ching Po Tong Fire Brigade na pribadong Volunteers Fire Brigade na nagtatabang sa Fire Station kan ciudad kun igwang mga insidente nin kasulo.

Piglalaila nin kalayo an sarong apartment type asin duwang establisimiento de negosyo sa barangay Triangulo, Ciudad nin Naga na tolos nakaresponde an mga fire truck kan BFP, Ching Po Tong Fire Brigade asin White Brigade. (NAGA WHITE BRIGADE)

Si Fire Inspector Emmanuel Ricafort, jefe kan Bureau of Fire Protection sa ciudad nagsabi na alas 10:05 nin aga kan Marso 1, 2021 kan may mag-apod sa Fire Station na igwang insidenteng kasulo na nagpuon sa apartment na marikas man na naglaila sa duwang establisimiento de negosyo.

Sa inbestigasyon nagluluwas an kalayo nagsilyab sa napabayaan na electric fan na sagcod na madaling naglaila sa laog kan residencia asin nakabalyo pa sa duwang establisimiento.

An maysadiri kan apartment pigbisto ni Ricafort na si Fidel Ginoo na nabigla man kan insidente mas marhay ngani anas nakaluwas sa apartment an mga okupante.

Nagrereclamo man si duwang establisimiento na nalugi sinda kan kasulo asin mapuon naman sinda sa uno alagad mayo man sindang magiginibo sa aksidenteng nangyari.

Sinabi pa ni Ricafort sa inisyal na report kan saindang inbestigador maabot sa Php800 mil an danyos sa premirong aldaw kan Fire Prevention Month.

An sinambit na kasulo ika-anom nang veces nangyari ngunian na taon 2021.