Pagmangno

Ang mensahe kan opisina para sa Pasko kan nakaaging 2024 iyo ang minasunod: “Dakul man inagihan ang sektor kan pagtanom asin pag-sira, satuya man ining nalampasan. Sa pagtapos kan taon, maogma kita sa mga narecibe ta man na pag rekonosir sa mga espwerso kan sektor. Sa paglaog nin panibagong taon, mas madangog kita sa boses kan satong mga paraoma asin parasira! Maogmang Pasko asin Ma-SARIG na Bagong Taon!”

Exacto sarong taon na ang nakaagi segun sa social media ang nasabing post. Sarong taon pa sana man alagad sa pagmate garo duwang taon na ta harani naman matapos ang 2025. Ikumpara ta ang 2024 sa 2025 sa perspektibong agrikultural.

Sa aspeto kan mga programa asin proyekto para sa mga paraoma asin parasira, nagpadagos ang pag-implementar kan mga lokal asin nasyonal na asistensya hale sa Department of Agriculture (DA) asin iba pang agencias de gobierno. Naging posible ini dahil sa makusog na pakikipagtabangan kan mga LGUs (Local Government Units) asin NGAs (National Government Agencies). Minsan ngani ang apod sa mga Municipal o City Agriculture Office, “DA” man.

Pag-abot sa mga kalamidad, mas naging dikit ang danyos na dara kan mga bagyo ngonian na taon kumpara sa mga kalamidad kan 2024. Pag kinumpara ang bagyong Kristine sa bagyong Uwan, mas halawig ang panahon na ginugol para kita makabawi. Mas halangkaw ang kantidad kan danyos-agrikultural asin comercial na dara kan Kristine. May dara man na baha ang Uwan pero madali sanang nagkulpa.

Idagdag ta ang aspeto na mayo man direktang epekto sa performance kan sektor kan agrikultura alagad importanteng maray sa paghaman kan mga obheto, ang pag-gobernar asin pag-tao nin prayoridad sa sektor. Ngonian na taon, sa paagi kan Independent Component City Agricultural and Fishery Council (ICCAFC), mas nagdangog kita sa boses kan paraoma asin mga parasira. Ini mahihiling sa mga proyekto asin programa na kasimbagan sa mga angat na saindang inaagihan.

Sa 2026, dapat mas makusog ang pagmangno sa sektor kan agrikultura. Igua nin nagkakapirang kahulugan ang tataramon na pagmangno.

Enot, ang pagmangno-pangangataman. Ang pangangataman o “care” nahihiling sa esfuerzo na darahon ang sektor kan mga paraoma asin parasira sa pirmi nindang ikakarahay. Siring sa mga tinanom, gabos na kaipuhan tanganing magtalubo nin marhay asin mabaskog, itinatao. Kaiba sa pag-ataman ang oras na ginugugol na pasiring sa malinaw asin marhay na direksiyon.

Ikaduwa, ang boot sabihon nin pagmangno, pagmakulog. Ang pagmakulog mas hararom na klase nin pangangataman, ta digdi may kaakibat nang responsibilidad. Ang pagmakulog hale sa kada saro na yaon sa sektor, mag-gobyerno, mag-pribado, magparaoma man o parasira. Minamakulgan ta ang sektor tanganing mas maglawig ang pagtao ta nin importansya o pagpapahalaga digdi.

Ikatolo, ang pagmangno- pag-aram o pagkakaigua nin kamalayan. Ang pag-aram importante sa pagpapararom nin pagbisto sa sektor. Ang hararom na pagbisto sa sektor kan agrikultura kakambal ang presencia kan kada saro. Ang kamalayan mas makusog sa paagi nin pag-komunikar na may kalinawan, saysay asin may pakinabang.

Ini ang mensahe ta ngonian sa taon na maagi asin sa taon na paabot ngonian na panahon nin Ka-Paskohan: Mas nagdangog kita ngonian sa boses kan satong mga paraoma asin parasira. An satong naging simbag mga proyekto asin programang saindang mapapakinabangan. Sa maabot na 2026, kita mas matao nin pagmangno sa sektor kan agrikultura tanganing maka-kontribwer pa lalo sa lokal na ekonomiya kan satong ciudad. Maogmang Pasko asin mas Ma-SARIG na 2026!