Pagnipis suplay kuryente sa bulan nin tag-init piglalaoman

Posibleng magkaigwa naman nin pagnipis kan suplay nin kuryente sa bulan nin tag-init asin haros taon-taon nangyayari ini sa mga cooperativa nin electricidad na apektado an saindang serbisyo huli kan biglang mga pagpalsuk kan suplay kun nagkakaigwa nin ‘‘rotational brownout’’.


Alagad si Rinner Bucay, opisyal na parataram kan Camarines Sur II Electric Cooperative (Casureco II) Inc. nagpahayag naghahalat sinda kan opisyal na kamunikasyon hale sa National Grid Corporation of the Philippines (NGCP) sa piglalaoman na pagnipis kan suplay asin dai mahahale digdi an mga biglaan na brownout.


Kan nagtalikod na taon nagparanipis an suplay kan kuryente kan mag-shutdown an doseng planta nin kuryente.


Huli kaini, an biglaan na pagwara nin suplay nin kuryente sa Casureco II mayo sa kontrol kan manijamiento.


Piglalaoman na puedeng mangyari ini sa mga bulan nin Marso, Abril asin Mayo huli ta iyo an panahon nin tag-init asin dakul an nag-gagamit o sarabay orog na sa mga industriya asin iba pang establisimiento.


Kun mangyari man ini, sinabi pa ni Bucay na dapat magtabang an mga miembros-consumedores sa paagi kan pagtipid sa pag-gamit kuryente.


Sa Ciudad nin Naga, an saindang pig-iibitaran na dai makabale an mga hospital na 24/7 an saindang serbisyo nganing dai maapektaran an mga pasyente.


Kadakle nangyayari an ‘‘rotational brownout’’ puon alas 11:00 nin aga hasta alas 12:00 nin udto alagad puedeng igwa pang hapon defende sa nipis kan suplay kuryente, sabi pa ni Bucay.


An aatubangon naman kan mga cooperativa nin electricidad kun igwang problema sa suplay, an saindang mga power supplier posibleng magpalangkaw kan saindang tarifa na an mangyayari ipapasa man sa ‘‘end users’’ o miembros-consumedores. (dpa)