Pagnombra nin politico sa DepEd dapat isikwal na

Nagtutubod an mga paratukdo sa Bicol na dapat isikwal na kan Malacañang an pagnombra nin politico sa magiging bagong sekretaryo kan Department of Education (DepEd) karibay ni Bise Presidente Sara Duterte na nagdemiter na sa puesto alagad maepekto sa Hulyo 19, 2024.

Si Apollo Sebello, Presidente kan Alliance of Concerned Teachers (ACT) Bicol Union, sa entrevista kan Bicol Mail nagpahayag na dapat iguang kabatiran sa ngaran na edukasyon asin namamate an tunay na sentimiento kan paratukdo tanganing madaling atubangon an mga isyu asin iba pang mga programa na kaipuhan iimplementar kan DepEd.

Dai na dapat mag-nombra nin politico nganing dai makoloran an programa sa edukasyon huli ta minsan nagkakaigua nin kapaboran mientras na dai man naiintindihan an dapat na solusyon sa pagpadalagan sa ngaran na edukasyon. Sabi pa ni Sebello.

Saro sa mayor na isyu asin tuyaw kan kadakli sa paratukdo sa pahalion nang sekretaryo iyo an pagpahale kan mga retrato asin iba pang nakadukot sa lanub kan classroom kabali na si kros na nakapako si Jesukristo. Haloy nang gawi ini kan paratukdo perang decada na an nakakaagi alagad pinabaklas.

Sa mga naginibohan sa laog nin duwang taon nagkaperang pulisiya an naimplementar alagad kadakle dai man gabos sagcod na binayaan. Igua man naginibohan siring kan pagpalawig kan school days feeding program.

Nagkapera man na paratukdo an nagsabi na tama sanang isikwal na an pagnombra nin politico sa saindang ahencia huli ta ginagamit pa sa ambisyon politica mantang an cuarta hali sa caja kan gobierno.

Mientras tanto, si DepEd Regional Director Gilbert Sadsad nagpahayag man na an paghilig ni Duterte sa gabinete saindang pigrerespeto.

Si dating Presidente Rodrigo Duterte inapod na ‘'bangag’’ si Presidente Marcos asin tinutuyaw an administrasyon siring sa planong pag-enmienda kan 1987 constitution asin nagkapera pang mga isyu maging an saiyang aking alcalde sa Ciudad nin Davao contra na ki PBBM.