Pagpabakal nin replikang armas sa NCPM, binabawal
An manijamiento kan Naga City People’s Mall (NCPM) nagpatanid sa mga negosyante sa mercado na estrictong binabawal an pagtienda kan replika nin armas o badil huli ta oras magsinutil kukumfiscaron kan saindang market guard.
Ini an patanid ni Market Supervisor Neptali Pabines mantang igua na kaining ley na ibinabawal huli ta puedeng gamiton sa ilegal na actividad siring kan hold upper na magpapamalomalo tunay na armas an saindang bitbit.
Kan nakaaging holiday season estrictong pinagbabawal kan mga awtoridad an pagpabakal nin mga replikang badil.
Maging an Commission on Election (Comelec) sa tahaw kan saindang implementasyon sa gun ban kabale ini sa mga pinagbabawal mantang hinale na si deadly weapon.
An election period nagsikad kan Enero 12, 2025 sundo sa Hunyo 11, 2025.
Segun pa sa Comelec an ‘‘Airsoft. Air guns, imitation firearms replicas’’ kabale sa saindang pinapangalad.
Iguang mga Comelec checkpoints sa manlaen-laen na parte kan nasyon an sinambit na mga armas kabale sa dapat kumfiskaron.
Sa Naga City Police Office (NCPO), poon na magwarak sinda nin mga checkpoints kan Enero 12, 2025 mayo pang nadadakop na nagbibitbit nin ilegal na armas.
Comments