Pagpadagos kan face-to-face classes dagos nang iginilid

Harayo na an posibilidad na idagos an propuestong limited face-to-face classes sa escuelas publica ngunian na school year mala ngani dai na natukar si kahagadan kan sektor nin magurang na dapat magkaigwa man giraray nin klase sa classrooms dawa duwang aldaw cada semana.


Si City School Division Superintendent Manny De Guzman kan Department of Education (DepEd) sa Ciudad nin Naga nagpahayag sa entrevista kan Bicol Mail sa paagi nin telepono na kan magpa-apod nin conferencia si regional director Gilbert Sadsad kan Enero 13 dai kabale sa agenda an posibilidad na magrecomendar sinda nin face-to-face classes sa mga lugar kan low risk (sa mga barangay o lugar na nasa irarum kan Modified General Community Quarantine o MGCQ).


Sa miting haros nakaconcentar sana sa saindang mga accomplishment report kan division superintendent asin kabale na si pig-anunciar na kumfirmasyon sa mga na-promote na paratukdo asin opisyales kan DepEd.


Pig-osipon pa ni De Guzman haros preparado na sinda kan Enero 11-12 sa pilot implementation sa mga lugar na zero asin hababa an caso sa coronavirus disease.


Digdi sa Bicol maabot sa cuarentang (40) escuelahan kadakle sa mga barangay an pigrecomendar asin na-probaran kan DepEd.


Alagad kan Deciembre 26, 2020 si Presidente Rodrigo Duterte nag-anunciar na saiyang kinacancelar an pigtalaan na limited face-to-face classes.


An nagin dahilan iyo an bagong United Kingdom variant kan Covid-19 na madaling mag-ulakit na dilecado sa mga estudiante sa escuelas publica.


Si Secretary Leonor Briones iyo an nagrecomendar kan face-to-face classes alagad mahalat kan bagong plano urog na an recomendasyon kan Inter Agency Task Force mantang madali naman magtapos an school year 2020-2021. (DPAureus)