Pagpalista sa Comelec masikad sa Febrero

An mga lokal na opisina kan Commission on Election (Comelec) naghahalat nalang sa resolusyon kan saindang opisina sentral sa pagbuelta liwat kan continuing registration na masikad sa Febrero hasta Septiembre 2024 kasunod kan saindang pag-andam sa eleksyon nasyonal asin lokal sa May 2025.

Sa Ciudad nin Naga, si Abogado Maico Julia Jr. Election Officer nagpahayag na igwa na sindang amay na mga pag-andam para sa masunod na bulan sa pagrecibe kan mga aplicante nganing magpalista para sa eleksyon sa Mayo 2025.

Naglalaom an election officer na puedeng maglangkaw nin hasta sa 6,000 na dugang na botantes an ciudad sa presente kaining 120k sa huring pirilian kan Sangguniang Kabataan asin Barangay kan Oktubre 30, 2023.

Alagad an presenteng 120k rehistradong botantes kan ciudad posibleng mag ina mientras dai maiibitaran na magbalyong lugar asin mag-abroad.

An mga calificado dapat nag-eedad poon sa 18-anyos pataas mantang rerecibihon man an mga transferee.

Nag-apelo an Comelec na dai na magpaabot nin ultimo diya kun mapalista nganing mayo nang mangyaring halabang pila asin suroksukan.

Magkakaigwa man giraray nin satellite registration sa mga malls asin escuelahan.

Sinikwal na kan commission an Smartmatic alagad riribayan man giraray nin bagong machine na magdedepende na sa saindang main office, sabi pa ni Julia.