Pagparampahog kan overpass tinugotan kan Capitolio Provincial

Daing kaulangan sa Capitolio Provincial kan Camarines Sur nganing tugotan tolos an Camarines Sur 3rd Engineering District kan DPWH sa Baras, Canaman, Camarines Sur an paggaba kan dai man napapakinabangan na overpass sa atubangan kan Camarines Sur National High School (CSNHS) sa Peñafrancia Ave. Ciudad nin Naga.

Pinarampahog kan heavy equipment kan DPWH, banggui kan Septiembre 24-25, 2022 na binantayan kan opisyales de barangay kan Peñafrancia sa pamamayo ni PB Ricardo Siera Jr. asin Public Safety Office.

An overpass pinabugtak ni dati asin dipuntong Gobernador asin Congresista Luis Villafuerte.

Overpass sa Penafrancia Avenue, Ciudad nin Naga ginagaba kan personajes kan CamSur 3rd Engineering District kan DPWH. (PB Ricardo Siera Jr.)

Sa surat ni District Engr. Romeo Doloiras ki Alcalde Nelson Legacion kan Septiembre 2, 2022 pig-inpormaran an jefe ejecutivo na aprubado kan Capitolio Provincial nganing tawan nin buelo an road widening asin drainage projects sa Peñafrancia Ave.

An pagpahiwas kan tinampo hali sa Peñafrancia Ave. masumpay sa enot nang pig-iimplementar na kaparejong proyekto sa San Felipe-Pacol-Carolina.

Dakul nang mga poon nin kahoy sa San Felipe sundo sa Carolina asin Pacol an pinutol an mga kahoy alagad igwang ‘‘permit to cut’’ an DPWH hali sa Department of Environment and Natural Resources (DENR).

An 3rd Engineering District kan DPWH sa Camarines Sur nagkapera nang mga national road an saindang pinahiwas. Ini kinababalihan kan Concepcion Grande-Del Rosario, Magsaysay Bridge, Magsaysay Ave sundo sa M.T. Villanueva Ave, asin San Felipe-Carolina mantang nagkapera pang patinampo sa mga barangay an nakumpleto nang natapos. (dpa)